Leeds-in hnehtu la tawng lo

Pathianni zan Premier League inkhelah Leeds United chu an mikhual Crystal Palace nen goal awm loin an inhnehtawk a, Leeds hian point kua hmuin season kal mekah an la tlawm lo.

Elland Road-ah inkhel a nung tawk lo a, Daichi Kamada-a'n Whites (Leeds sawina) tlarhnung a rum ṭhaihin, Leeds tan Ao Tanaka-a'n a chance neih chu goal zawnah a kaltir thei lo a, first half-ah chance dang hmuh tur a awm lo.

Second half-ah Palace tan Kamada, Yeremy Pino leh Jefferson Lerma ten an chance neih an hlah vek a, Leeds keeper James Trafford a che ṭha bawk. Eagles tan Tyrick Mitchell-a'n goal khung mah se, ball cross tu Anan Khalaili a lo offside avangin sut leh a ni.

Hun tawp hma hretin Dominic Calvert-Lewin-a'n chance duhawm a hlah a, English forward hian khung ngat se a team a chakpui thei hial ang. Hun tawp thlenga goal a luh loh avangin team pahnihten point an insem.

Tun season-ah Leeds hi vawi hnih chak tawhin vawi thum an inhnehtawkna chiah a ni a, table-ah panganaah an awm mek. Match nga an khelh tawhah goal thum chiah an la chhuah a, Manchester City aṭanga an lak luh Trafford a thawh hlawk takzet.

Hetihlai hian Eagles erawh vawi khat chakin vawi khat an inhnehtawkna a ni a, vawi thum tlawm tawhin 15-naah an awm mek bawk. Pierre Sage-a'n result ṭha a neihpui vat loh chuan a dinhmun a nghing ang.