PSG innghahna thar Torres

Spanish forward Ferran Torres chuan a Paris Saint-Germain tan goal khung a ṭhulh thei lo a, Pathianni zan khan Olympique Marseille lakah Torres-a'n goal khung lehin a team chu 2-1 in a chakpui.

Kum 26 mi Torres hian minute 66-naah Desire Doue cross chu chiang zetin a tauh lut a, a team hma a hruaipui. Mahse Marseille tan Manchester United midfielder hlui Angel Gomes-a'n a sut a, PSG an chesual leh tura rinna a lian hman.

Mahse champion lai team tan captain Marquinhos a inlar a, Brazilian defender hian hnai tak aṭanga goal khungin an chakna goal a ni zui nghal. Marseille tan Timothy Weah-a'n red card a hmuh zui avangin thawh leh ngaihna a awm tawh lo a, PSG an chak.

Luis Enrique naute hi Ligue 1-ah tun season-a an vawi hnih chakna chiah a ni a, an forward ten league-ah goal an khung hleihtheih loh laiin Torres a awm hlauh a, Spanish coach tan lawmna tham a tling.

Torres hian Ligue 1-ah match nga khelin goal li a khung tawh a, chakna goal vawi hnih a khung bakah an match hmasa berah goal hnih khungin a chhanhim tawh bawk. Champions League-ah match khat khelin hattrick a siam tawh bawk.