Jamil a chak lo nghal

NorthEast United-in coach Robert Jarni an ban hnuah Khalid Jamil Chuan Highlanders kaihhruai hna thawk mah se a match hmasa berah an chak lo nghal a, Odisha FC chu 2-1 in an ngam lo. 

Zirtawpni zana Indian Super League inkhelah Martin Chaves chuan Guwahati club tan goal hmahruai a khung a, mahse Odisha a pan hnua goal khung bansan thei lo Manuel Onwu leh Martin Guedes ten chhangletin 2-1 in an chak daih. 

Aizawl FC boss hlui Khalid-a'n Mizo players chhawr a nei lo a, midfielder pawimawh Lalengmawia chu mimal thil avangin a inlan thei lo. Odisha tan Jerry Mawihmingthanga leh Daniel Lalhlimpuia ten bul ṭan lo mah se second half ṭantirah bench aṭanga luhtir an ni thung.

Inrinni zan Indian Super League inkhelah Kerala Blasters chuan 2-1 in Bengaluru FC an hneh a, Kerala club tan Bangalore club laka hnehna an chan hmasak ber a ni. 

Sunil Chhetri tel loa khel Bengaluru tran Deshorn Brown chuan goal hnih khung mah se Blasters hian Bartholomew Ogbeche freekick leh penalty hmangin an chhanglet a, 2-1 in an chak.

India captain Chhetri hi yellow card pali a neih tawh avangin Inrinni zan inkhelah a inlan thei lo a, amah ang thoa yellow card pali hmu tawh Juanan a khel thei lo bawk. 

Kum 35 mi Ogbeche hian Blasters tan league match 15-a khelhah goal 13 khungin assist vawi khat a nei a, Kerala club tan ani aia goal khung hnem an la awm lo - Blasters tan hian Lalruatthara chuan inkhel bul a ṭan. 

Nizan ATK leh Chennaiyin inkhel result kan hre hman lo a, Nilaini zana Jamshedpur-in FC Goa an mikhual hma chu inkhel dang a awm rih lo ang.