Israel-in Ireland manager an dem

Israel Football Association chuan Republic of Ireland manager, Heimir Hallgrimsson-a'n Israel chungchanga a thilsawi chu 'âtna leh lemchanna' tiin an dem thu an tarlang a, inkhelh hmain boruak a sang nghal.

Nations League lo awm turah Ireland leh Israel te hi September 27, Pathianni zan leh October 4, Pathianni zanah bawk an intawng dawn a, squad a puan laiin Hallgrimsson chuan, "Israel nen kan inkhel dawn lo, kan hmachhawn dawn zawk. Hnam anga indo kan khelhpui dawn lo, kan hmachhawn dawn zawk," a ti.

Thawhṭanni khan Israel FA chuan social media-ah chhang letin, "Khawvel leh mihringte tan hmun hrang hrangah ṭha takin hna kan lo thawk tawh a, Nobel Prize pawh kan lo dawng nual tawh.

Mahse Ireland Football team manager ṭawngkam duhtui lo tak leh âtna hian kan rilru a tina hle a ni. Keini pawh âtna leh lemchanna nen kan khel dun dawn lo, chutiang mize neitu lakah kan khel dawn zawk a ni," an ti.

Ireland Football Association chuan Israel FA thuchhuah hi an la chhang let ve lo a, an match khelh tur hi boycott tura nawrna pawh a awm tawh. Thawhṭanni khan Republic of Ireland team thlenna hotel pawnah nawrhna hi an lo kalpui tawh bawk.

Palestinian sipai pawl Hamas chuan October 7, 2023 khan Israel hi beiin, mi 1200 vel an thih bakah mi 251 chu an man a, Hemi chhanletna atan Israel chuan Palestine khawpui pakhat Gaza chu a bei let. United Nations chuan he thil thleng avang hian Palestinian mi 70,000 aia tam an thi tawh nia a hriat thu a sawi.

Irish infiammi 160 aia tam chuan Israel nena inkhelh duh loh lantirin Ireland FA lehkha chhuahah hming an sign tawh a, an zingah Olympian Ciara Mageean, Republic of Ireland footballer hlui Louise Quinn, boxer Tyrone McKenna leh Eric Donovan te pawh an tel.

Republic of Ireland hian Hungary-ah September 27, Pathianni zanah Israel hi an hmachhawn dawn a, inkhel hi boycott a nih loh chuan boruak a nung viauin a rinawm.

Ireland FA chuan, "Ireland jersey ha chunga inkhelh hi thil ropui tak a ni a, mahse tun hun hi thil dik tak ti tura hun ṭha kan neih chu a ni. He infiamna atan hian a pawimawh hle," an ti.