Switzerland tan Xhaka inlan dawn lo

Switzerland captain Granit Xhaka chu Covid-19 vaccine chungchanga Swiss prosecutor-ten an chhui chian hnuah, Thawhṭanni khan certificate lem a nei tih amah ngeiin a nemnghet a, an ram team aṭanga inhnukdawkin Nations League-ah a khel dawn lo.

Chhui letna

Kum 2021-a Arsenal tan Xhaka a khelh lai khan Switzerland chuan Greece an hmachhawn dawn a, ram pawna feh chhuak tur an nih angin test an neih hnuah Xhaka hi a positive a, a hun lai khan Switzerland squad-ah amah chiah vaccine la lo a awm bawk.

Khatih lai khan Swiss office of public health chuan Covid-19 vaccine lak chu mimal thutluknaah a dah a, mahse hmun ṭhenkhatah certificate neih kher an phut ṭhin avangin ram pawna zin chhuak turte chu nei turin a ti. Xhaka hi vaccine la loa awm chhunzawmin an ram tan pawh a feh chhuak ve lo.

Mahse a kum leh lawk March 2022 khan kum 33 mi Xhaka hian Dutch chanchinbu mite nen an inkawmnaah vaccine a lak thu a sawi a, hei hnu hian Swiss midfielder hi chhui a ni.

Kum 33 mi Xhaka hian vaccine vawi hnih a la ngei a, mahse a vawi hnih lakna hi record-a a lan dan a inang ta lo. Record ṭhenkhatah November 11, 2022 angin lang mah se November 8, 2022 hmuh tel a ni.

Khatih hunlaia Xhaka khawsak dan chhui let niin, November 6, 2022 khan London-ah awmin Chelsea nen an inkhel a, ni hnih hnu lawkah Brighton nen an inkhel leh nghal. Mahse vaccine a lakna hi Switzerland khawpui pakhat Lucerne-ah a nih avangin rinhlelh a ni zui ta zel.

A pawi zo ta

Sunderland midfielder chuan Thawhṭanni khan social media-ah thuchhuah siamin, khatih lai khan vaccine chu a ringtawk lo a, a him tawk tih a chian loh vang a nih thu a tarlang.

Xhaka chuan, "Khatih lai khan Covid-19 vaccine kha ka ring ngam lo a, a kalhmang pangngai anga kal loin vaccine certificate hi ka la ta zawk a ni. Mahse vawiinah he ka thiltih kha a dik lo tih ka hre tawh a, ka tihpalh takzet. He thutlukna avang hian mawhphurhna ka la a, thudik hailanna kawngah ka inthiarfihlim dawn lo. Thuneitute nen ṭha takin kan thawkho ang." a ti

Engtin zel?

He thu buatsaih lai thleng hian Xhaka hian eng hremna nge a hmachhawn dawn tih hi a la chiang lo a, mahse kum 2023 khan Switzerland mipa ice hockey coach Patrick Fischer chu kum 2022 Beijing Winter Olympics-ah, Covid-19 certificate lem a hman avangin thiam loh chantir a lo ni tawh.

Fischer hi criminal court chuan Swiss Franc 38,000 chawitirin, hemi kum April thlaah Switzerland coach aṭanga ban a ni zui. International Ice Hockey Federation chuan kum li chhung atan a hrem bawk.

Switzerland hian Scotland, North Macedonia leh Slovenia te nen Nations League group match an khel dawn a, an rama tana inlan hnem ber Xhaka (152 caps) tel loin an hmachhawn a ngai dawn.

Sunderland boss Regis le Bris chuan Pathiannia Manchester City laka an tlawm hnuah, Xhaka chungchanga an zawhnaah channa a pe duh lo tawh a, Le Bris chuan, "Heng harsatna leh thil thleng chungchang sawi hi ka tih tur a ni lo. Football chauh hi ka chan a ni a, football chungchangah chuan Xhaka hi a thiam takzet." a ti