Isack Hadjar a lo kir dawn

Red Bull driver Isack Hadjar chu a ban rek hliam avanga intlansiak pathum a chawlh hnuah, September 27, Pathianni zana Azerbaijan Grand Prix-ah a inlan leh tawh dawn.

Kum 21 mi Hadjar hian Hungarian GP hnuah chawlh an hman laiin gym-a training a neihnaah a ban rek a tina a, Dutch GP, Italian GP leh Spanish GP-ah a inlan thei lo. Hadjar aiah hian Liam Lawson chu tlantir a ni.

New Zealand driver Lawson hian Hadjar awm loh chhungin parukna, 14-na leh parukna a ni hman a, che chhia tia sawi tur ni lo mah se podium a lawn pha lo. Chutihrualin Hadjar aiawhtu a nih avangin pressure nei chungin a tlan a, a tan a harsa dawn.

Red Bull chuan, "Hadjar a dam chiang tawh a, Baku City Circuit-ah Lawson a thlak leh dawn. Hadjar chawlh chhungha Lawson-a inpekna leh taimakna avangin team chuan thinlung takin kan lawm a ni. Harsatna karah rawn inlan mah se, a chet danah lungawi lohna tur engmah a awm lo," tiin thuchhuah an siam.

French driver Hadjar awm loh chhungin a teammate Max Verstappen a che ṭha a, Monza-ah pathumna niin Madring Sur-ah pahnihna a ni bawk. Dutch driver hian podium vawi ruk lawn tawhin point 145 a hmu tawh a, drivers table-ah paruknaah a awm mek.

Hetihlai hian Hadjar erawh podium vawi khat chauh la lawnin pariatnaah a awm a, a inhliam avangin point a hloh hnem hle. Red Bull hi constructors table-ah palina niin hmahruaitu Mercedes bakah Ferrari leh McLaren te an tluk lo. An hnaih ber McLaren nen an inthlauhna hi point 76 lai a ni tawh