Villa-ah pawh Garnacho a buai

Alejandro Garnacho chuan a hun harsa a tawng leh mek a, Aston Villa manager Unai Emery chuan Argentine winger hi rinrawl ni turin a inpeih tawk lo tih a sawi a, Garnacho buaina a kiang thei meuh lo.

Kum 22 mi Garnacho hian Villa a zawm aṭangin thla hnih chauh a la liam a, a hun tam zawk substitute bench-ah hmangin vawi thum chiah a la lut. Khelmual chhungah minute 31 chiah hun a la hmang a, Villa match hnuhnung paliah bench-ah a ṭhu tluan vek.

Spanish manager Emery-a'n a ruahmannaah Garnacho aia ngaih pawimawh zawk player dang a nei tawh nia sawi a awm a, an zingah academy chhuak George Hemmings leh nipui laia an lakluh Ibrahim Mbaye te pawh an tel.

Pre-season-ah a hmai a tihnat avangin Garnacho-a'n buaina a neih belh a, Paris St-Germain laka Super Cup-a an tlawm ṭum pawh khan a inlan thei lo. Emery chuan Villa squad-ah tel reng thei turin hun a la mamawh a, a ṭan lehzual a ngai tih a sawi.

Chelsea-in Manchester United aṭanga pound maktaduai 40 vela an lak luh hnuah, Garnacho hian Premier League match 24 a khelhah goal khat leh assist pali chiah a la nei a, season khat hnuah loan-in an chhuahtir leh nghal.

Villa hi an chhuanvawr Morgan Rogers-a'n Chelsea a zawm avangin a thlakna tur an melh a, Saudi Pro League pan ta Crysencio Summerville an chan loh hnuah Garnacho an la lut a, tun dinhmunah mamawh channa a ni lo chiang hle.

Garnacho bakah hian Nicolas Jackson pawhin Villa hi a zawm a, mahse Senegalese forward erawhin club record siamin a nghetin a zawm thung. Jackson-a man hi £65 mtd a ni a, Villa hian £47.5 pe phawtin a khelh ṭhat dan a zira £17.5 mtd pe leh turin an inrem a ni.