Valverde a chawlh a ngai dawn

Real Madrid captain Federico Valverde chu Pathianni zana Atletico Madrid nen an inhmachhawn ṭuma a inhliam avangin, kar hnih aṭanga kar thum tal a chawlh a ngai dawn niin khawthlang chanchinbute chuan an ziak.

September 20, Pathianni zana Madrid derby khelhah Valverde hi Atletico forward Lee Kang In-a'n hlauhawm takin a rap a, Uruguayan midfielder hian minute 90 khel tluan mah se a ke rekah hliam a tuar.

Los Blancos manager Jose Mourinho pawh Valverde bakah Jude Bellingham laka an foul danah a lawm lo a, Diego Simeone naute chuan first half-a red card pahnih chawi tur an nih thu a sawi.

Tun hnaiah Real boruak a ṭha tawk lo a, league-ah vawi hnih an chak tawh loh avangin an hmelma Barcelona chu point rukin an umpha tawh lo. Hetiang karah hian Valverde awm lo tur hi Spanish club lian tan channa nasa tak a ni thei dawn.

Mahse international break a awm avangin kar thum chawlh an hmang dawn a, league match an khelh leh hunah Valverde a dam leh hman a rinawm a, Real tan a inlan leh nghal theih a beiseiawm.

Uruguay hian September 24, Ningani zingah Japan nen friendly match an khel dawn a, September 28, Thawhṭanni tlaiah South Korea nen an inhmachhawn leh dawn bawk.

Friendly match an khelh hmain Sky Blues (Uruguay sawina) coach Diego Forlan chuan Valverde hi a ko tawh a, mahse a inhliam leh tak avangin a zin chhuah ve a rinawm loh.