Nicolas Batum-a'n inkhelh a chawlhsan

Los Angeles Clippers forward Nicolas Batum chuan inkhelh a chawlhsan a, Batum hian Thawhṭanni zan khan instagram-ah video post-in basketball a chawlhsan thu hi a puang a, NBA-ah a hmel hmuh tur a awm tawh dawn lo.

Video phochhuahah Batum chuan a fapa Ayden hnenah, "Basketball ka chawlhsan chhan hi tam tak a awm. Inkhelin ka awm bo rei tawh a, tunah chuan lo haw a i bula hun hman ka duh a ni.

Basketball-a ka hun hman chu a tawk tawhin ka hria, kum hnih liam ta khan France tana ka inkhelh ka chawlhsan tawh a, tunah chuan NBA-a ka hun pawh a tawp ve dawn ta. Inkhelh hnem leh lutuk chuan a tawk chin hriat a har ṭhin a, tunah chuan basketball-a ka tih tur chu ka hlen vek tawh a ni," a ti.

Kum 37 mi Batum hian 2006 leh 2008 inkarah khan France Basketball League-ah Le Mans Sarthe tan a khel a, 2008 khan NBA draft-ah Portland Trail Blazers chuan an club a khel turin an thlang chhuak a, NBA-a a career a inṭan.

Blazers tan kum 2015 thleng khel zuiin, 2011 khan an ram club SLUC Nancy tan a khel zeuh. Blazers hnuah hian Charlotte Hornets, Los Angeles Clippers leh Philadelphia 76ers tan a khel leh a, 2024 khan Clippers-ah let lehin a club hnuhnung ber a ni zui.

French forward hian NBA-ah kum 18 hun a hman chhungin a champion hman ta lo a, mahse an ram team chu 2020 leh 2024 Olympic-ah silver medal a lakpui a, 2021 khan French player of the year-ah thlan a lo ni tawh bawk.

Season hmasa khan Clippers tan match 74 la khel mah se vawi ruk chiah bul a ṭan a, rinrawl ni pha tawh lo mah se a tawnhriat ngahna chu Western Conference club hian an la ṭangkaipui hle.