Sports Minister-in NE Regional Muaythai C'ship 2026 a hawng

Muaythai Association of Mizoram (MAM) buatsaih North East Regional Muaythai Championship 2026 chu September 22, Thawhlehni zan khan R. Dengthuama Hall, Mualpuiah Sports & Youth Services minister Lalnghinglova Hmarin a hawng.

Sports Minister Lalnghinglova Hmar chuan, "Muaythai chu tunlai Sports discipline ṭhang chak berte zinga mi a ni a, nakuma National Games thlengtu tur state Meghalaya Chief Minister pawh Muaythai Association of India President a ni. National Games-ah hian Muaythai pawh telh a nih theih nan hma an la a, a tel thei a nih chuan Muaythai dinhmun chawisanin a awm ang," tiin a sawi a, kum 28 liam ta Asian Games 1998 Thailand-ah khan Mizoramin Muaiythai demonstration an neih tawh thu a sawi a, 2025 Asian Youth games -ah Muaythai telh a nih thu a sawi lang bawk.

Tun ṭum inelna hi NorthEast pum huap inelna a ni a, vawiin hian zawhfel a ni dawn. Nimin hawnnaah hian Muaythai Association of Mizoram general secretary Vanlalawmpuia'n inlawmna thu a sawi bakah president Johny Ngurthansanga'n thu a sawi bawkin Muaythai Association of Meghalaya ten Muaythai demonstration an nei a ni.

Mizoram hian kum 2010 khan 11th National Muaythai Championship a thleng tawh a, team champion an ni. World Championship-ah gold medal pahnih, silver pali leh bronze paruk an la tawh a, Asian Championship-ah gold, silver leh bronze pahnih ṭheuh an la tawh bawk a, international referee leh judge pathum ve ve an nei mek bawk.