Hruaia inlan hun a thleng ta
Mizoram Labour Link LPS Pro Fight 2026 zan 14-na chu zaninah chhunzawm a ni leh dawn a, zan dang zawng aia inhnek hmuhnawm hmuh tur a awm dawn. A chhan chu Pro Fight champion tawh C. Lalhruaitluanga a inlan dawn vang a ni. Pro Fight hi LPS Arena-ah neih a ni a, a hmuna en man hi Rs 50 niin LPS YouTube channel (member only) aṭangin Rs 179 chawiin a en theih bawk.
Hello Hruaia
Chawngtlai boxer Hruaia'n kum hnih kal ta khan Pro Fight-ah tlawm mah se tluk hlen a tum lo a, thawhchhuah leh tumin ṭan a la. Middleweight-ah tel tura hming a pek luh aṭangin boruak a nei nghal.
Kum 2022 khan welterweight-ah Hruaia hi a champion a, 2023 khan weight sang zawk middle-ah insawnin title fight-ah F. Lalthanliana Junior hnehin weight hrang pahnihah a champion.
A vawi khatna atan a zawna middle champion nih a tumna erawh a tihlawhtling zo lo a, kum 2024 khan a hma kuma a hneh tawh Lunglei Electric Veng boxer Thanliana nen intawng lehin a chak zo lo. Thanliana hnen aṭangin champion kawnghren chhuhsak ngei tumin a inlan leh dawn.
Hruaia hian Vanlalsanga a hmachhawn dawn a, zanina 'main event' tur a ni ang. Hruaia hmaa ding tur Suangpuilawn boxer Vanlalsanga hian zan khatnaah khan East Phaileng boxer Vanlaldika chu unanimous decision-in a lo hneh tawh.
Rinkai zawk ni lo mah se kumina inelnaah ring chhung boruak a tem tawh a, an rih bakah an kutthlak a nat avangin Hruaia barakhaih thei turin theihna sang tak a nei. Chawngtlai tlangval Hruaia pawhin chetsual theihna chance a nei a, a zuam a thiang dawn bik lo.
Lightweight-ah bawk
Pro Fight vawi 12-naah Lightweight inhnek chu hmuhnawm bera chhal ngam a ni rih a, zaninah pawh inhnek hnuhnung zawk Thangboi leh LV Robert Lalengliana te inhnek tur chu ngaihven hlawh zingah a tel pha.
Churachandpur boxer Thangboi-a'n inhnek vawi hnih a hmachhawn tawh a, split decision leh unanimous decision-in a chak ve ve. Thangboi hian a kut a vai chhuah hnem avangin a khingpuite a tibuai hneh a, zaninah pawh a innghahna tur a ni.
Chutihrualin Tuipui Ferry tlangval Robert-a pawh vawi hnih tho a lo inhnek tawh a, North Lungpher boxer Vanlalpeka chu unanimous decision-a hneh tawhin Hmunpui boxer Gabriel Lalruatfela chu a knockout tawh bawk. Robert-a hi a sa a ṭha a, a kut thlak a nat bakah inrintawkna a neih san lai tak a nih avangin inhnek hmuhnawm a beisei ngam.