Ballon d'Or ka phu ve tawk - Yamal

Barcelona forward Lamine Yamal chuan Ballon d'Or sem leh hmasak ber tur chu dawn a phu tih a sawi a, he chawimawina hian goal leh nomawi chawi zat ringawta innghat tur a nih loh thu a sawi bawk.

Kum 19 mi Yamal chuan, "Inkhel entu mipuiin ka theihna te an hria a, khelmual ka luh tawh chuan theihtawp chhuah chungin nuam ti takin ka khel ṭhin. Barca tan nomawi tam tak ka chawi bawk a, chu bakah chuan nomawi zinga hlu ber World Cup ka chawi bawk. Chu zawng ai chuan ka khelh dan hi keimah min tidanglamtu ber chu a ni.

Mahse a tawpah chuan mahni team chakpui theite hi player ṭha leh ṭangkai an ni a, chuvang chuan keipawh hi ballon d'Or phu ber zinga mi ka ni. Tun dinhmunah pawh Spain leh Barca tan ka che ṭha a, mimal tak pawhin ka lawm," a ti.

Spanish rawlthar hian season hmasa khan inelna hrang hrangah match 45 khelin goal 24 leh assist 18 a nei a, La Liga leh Super Cup-ah Barca a champion pui. Kumin World Cup khelh zawh takah khan match riat khelin goal khat a khung bawk.

Tun season-ah pawh Yamal hi a che ṭha nghal a, La Liga-ah match sarih aṭangin goal sarih a khung tawhin assist pali a nei tling tawh a, Catalan club chak tluan nan a thawh hlawk hle.

Yamal chuan sawi chhunzawmin, "Ka lo sawi tawh ṭhin angin Ballon d'Or hi kum khat chhunga player thiam leh hmuhnawm ber hnenah hlan ṭhin a ni a, an khel lai kan en nin theih loh an ni tlangpui. Chu chu keipawhin player ṭha tehna atana ka hman a ni, goal khung zat ringawt ni loin.

Ballon d'Or sawi apiangin ka rilruah Lionel Messi leh Ronaldinho te an lo lang ṭhin. Anni kha player thiam bik an ni a, an inkhel en khan hlimna min pe ṭhin a ni," a ti.

Tun hnaiah Yamal hi a ṭawng hnem a, anmahni ang bawka chak loh la nei lo Arsenal nen an khaikhinnaah sawi a nei leh hman. Spanish rawlthar chuan Premier League champion lakah an chungnung zawk a, inhmachhawn a châk thu a sawi.

Catalan club forward chuan, "Arsenal hi Barca nena inel tawk tur bera rin an ni a, mahse kan ṭha zawkah ka ngai. Kan inkhelh dan a inang hle a, chutiang khelhpui chu kan tan a nuam ṭhin.

Gunners bakah hian Paris Saint-Germain leh Bayern Munich te chu Barca tana khelh harsa tur team an ni bawk a, kan chak lohna lai rawn phawr chhuak thei tur team an ni," a ti.

Team pahnih chungchanga Yamal-a ngaihdan dik leh dik loh finfiah theih dan awmchhun chu, tun season Champions League knockout stage-a an intawn chauhin a ni dawn.

League round-ah Barca leh Gunners te hi an inhmachhawn thei dawn lo a, knockout round-ah erawh intum theih dan an nei thung. Team pahnihte hi an inkhel dawn a nih ngat chuan Yamal-a thilsawi vangin boruak a nun phah ang.

Hansi Flick-a naute hian league round-ah London club elpui ber Manchester City an hmachhawn dawn a, chutihrualin Mikel Arteta naute chuan Barca hmelma kumhlum Real Madrid chu Emirates Stadium-ah an mikhual dawn thung

Kum 2015-16 season khan UCL round of 16 hnuah Barcelona leh Arsenal te hi an la inhmachhawn leh lo a, hemi ṭum hian Arsene Wenger-a enkawl Gunners chu Lionel Messi, Luis Suarez leh Neymar te lakah 5-1 in an tlawm.

Tun hmain team pahnihte hi vawi kua an intawng tawh a, Spanish champion hi vawi ruk an chak a, Arsenal hi vawi khat chiah an chak thung a, Barca an chungnung zawk.