Pro Fight: Lightweight leh flyweight a pui

Mizoram Labour Link LPS Pro Fight 2026 zan 12-na chu Thawhlehni zan khan LPS Arena, Falkland-ah neih chhunzawm a ni a, bout 11 awmah knockout leh technical panga a awm. Heng zinga pali hi flyweight leh lightweight-a thleng a ni.

Beisei loh result

Zan 12-naah hian mipui pung khawm tam zawk chu lightweight inhnek en duh vanga kal ni mah se, flyweight boxer-ten ennawm ropui an lo hmuhtir a, beisei phak bakin boruak a ṭha.

Inhnek hmasa berah Ṭawipui South boxer Hmingdailova chuan unanimous decision-in Lalhruaitluanga, Ramthar Veng a hneh a, Hmingdailova hian a hnek chhuah hnem zawk bakah a chungnung zawkah a ṭang tluan zak.

Inhnek dawt leh pahnihah Vanhne boxer F. Lalpekhlua leh Vaikhawtlang boxer, Kapzalawma te chuan TKO hmangin an khingpuite an hneh ve ve. TKO-a chak ni mah se Pekhlua a vannei a, Vanhne tlangval hian Bawngkawn boxer Vanneihtluanga hi round thumna, minute khat pawh awm tling tawh loah a hneh hram.

Kâpzalawma erawhin hun a hmang rei lo hret thung a, Vaikhawtlang tlangval hian Bawngkawn West boxer Lalruatfela chu round hnihna an khelh zawh hma hretin a hneh.

Lightweight a pui

Lightweight-a inhnek hmasa berah Malsawmkima chuan, Thualthu boxer C. Lalmalsawma a knockout. Vaphai boxer Malsawmkima hian hnehna chang turin minute khat pawh a mamawh lo.

Lalrinhlua leh Lawmsangpuia te chuan round thumna khel zo ṭhakin, a tawpah split decision-in Maubuang boxer Lalrinhlua a vannei ta zawk. Maubuang tlangval Rinhlua hi 'fighter of the night'-ah thlan a ni zui.

Hei bakah hian Dinthar boxer Lalrohlua'n Chekawn tlangval Lawmsangzuala chu a knockout bawk a, Rohlua leh Lawmsangzuala te hian round hnih an khel thung.