Bayern-in Haaland an ngaihven

German champion Bayern Munich chuan Manchester City striker Erling Haaland chu an ngaihven a, Harry Kane a chhuah chuan a thlakna turin Haaland hi an duh niin khawthlang chanchinbute chuan an tarlang.

Kum 33 mi Kane hian tun season daih chauh Bayern-ah contract a nei tawh a, chhuah a duh thu sawi lo mah se Barcelona leh Manchester United te chuan lak tumin an hel reng.

English forward Kane hian Premier League-ah a kir leh hun a la awm mai thei tih a lo sawi tawh a, Bavarians thuneitute tan hriat nuam a ni lo ang. German club chuan thlun ngheh tumin hmala tho mah se, an hlawhtling ta lo a nih chuan Haaland lam an hawi ang.

Kum 26 mi Haaland hian 2022 khan Borussia Dortmund aṭangin City hi pound maktaduai 51.2-in a zawm a, Pep Guardiola hnuaiah England-a insiamrem turin hun a mamawh lo.

Norwegian striker hian Citizens tan match 205 khel tawhin goal 169 a khung tawh a, khawvela striker hlauhawm ber zinga mi a ni. Mahse Haaland hian nikum January khan kum kua leh a chanve daih contract thar a ziak a, Premier League chanchina contract daih rei ber tur a ni.

Kum 2034 thlen Haaland hian Etihad Stadium-ah contract a la nei tihna a ni a, hetiang a nih avang hian Bayern tan Allianz Arena-a seng luh a awlsam dawn lo. Haaland hian season kal mekah City tan goal nga a khung tling leh tawh a, EPL-ah khung hnem ber a ni mek.

Zanin dar 12:15 hian Nations League group stage khelh a ni dawn a, Norway pawhin an match hmasa ber atan Denmark an mikhual dawn a, Haaland hian bul a ṭan ngei a rinawm.