Ingram a inhliam nghal

Los Angeles Clippers forward thar Brandon Ingram chuan training-ah a ke a tina a, hei vang hian season tir lamah a inkhel ve thei dawn lo nia sawi a awm. Clippers-in chanchin duhawm lo an neih chhunzawm zel.

NBA journalist Brian Windhorst chuan Ingram inhliam thu hi sawiin, a kephah leh a ke artuiah hliam a tawrh thu a sawi. American forward hi season hmasa chawhnu lam khan a ke an zai avangin a lo chawl tawh a, rei lote hnuah a ke na vang bawkin a chawlh leh rih a ngai dawn.

Kum 29 mi Ingram hi season hmasa khan a khel chhe lo a, match tinah point 21.5, rebound 5.6 leh assist 3.7 nei ziah ang a ni a, 77 zet a inlan avangin a awm lo tur hi chânna nasa tak a ni dawn.

American forward tan kumin hi NBA kum 10 a khelhna tur chiah a ni a, kum 2016 draft-a Los Angeles Lakers-in an lak hnuah New Orleans Pelicans leh Toronto Raptors tan a khel tawh bawk. All Star-ah vawi hnih thlan ni tawhin, 2020 khan Most Improved Player-ah an lo thlang tawh bawk.

Tun hnaiah Clippers hian chanchin ṭha hriat tur an nei tlem a, tun thla tir khan 2019-a Kawhi Leonard hlawh pek dan chungchanga dan an bawhchhiat avangin hrem an tawk tawh a, dollar maktaduai 30 zet an chawi.

Hei bakah hian an club neitu Steve Ballmer chu kum khat chhung atan NBA kaihhnawih thilah inhnamhnawih an khap a, a team thil tihah pawh a tel ve phalsak a ni lo.

An hrem chhan ber Leonard chu $700,000 chawitir a ni a, suspend a ni lo hlauh thung. Kawhi hi inkhel thei lo tura hrem a nih loh avangin Raptors tan season tharah a inlan leh nghal thei ang.

Western Conference club boruak ṭha lo mah se, transfer-ah an che chhe lo. Tun nipuiah Ingram bakah tawnhriat nei ṭha Bradley Beal an la lut a, Lakers aṭangin Rui Hachimura an lak bakah free agent Jordan Miller an chang bawk.

Anni bakah hian ft ruk leh inches ngaa sang Jamarion Sharp chu two way contract an sign pui a, NBA-a khel a nih chuan player sang ber a ni nghal dawn. Japanese point guard, ft. nga leh inches riat chauha sang Yuki Kawamura la bawkin, NBA-a player sang ber leh hniam ber an kawl kawp dawn tihna a ni.