Amorim-a'n Endrick a duh

AC Milan head coach Ruben Amorim chuan an tlarhma tihchak nan Real Madrid forward Endrick chu lak luh a duh a, January-a transfer inhawn hunah loan-a lak a tum dawn.

Tun season-ah Endrick hian Jose Mourinho hnuaiah hmun a chang pha meuh lo a, vawi khat chauh a la inkhel. Striker-ah an rinrawl Kylian Mbappe a nek chhuak zo lo a, Carlos Espi a che ṭha bawk.

A sira hman dawnin a hnampui Vinicius Junior leh Brahim Diaz te an awm bakah, RB Leipzig aṭangin Yan Diomande an seng lut a, Endrick-a tan beisei a bo hle.

Kum 20 mi Endrick hian season hmasa pawh khan Santiago Bernabeu-ah hmun a chang lo a, kumin January khan a khelh tam theihna hmun tur panin loan-in Ligue 1 club Lyon a zawm.

Lyon tan Brazilian forward a vul a, match 21 khelin goal riat leh assist pariat a nei a, French club tan a chet ṭhat avangin World Cup khel turin Carlo Ancelotti-a'n a ko hial.

Tun dinhmunah Milan hian striker position-ah Santiago Gimenez, Goncalo Ramos leh Christopher Nkunku te an nei a, Endrick hi an la thei a nih chuan mual sirah an hman a rinawm.

Milan hian a sira khel thei turin tun hnaia che ṭha tak Andrej Kostic leh Christian Pulisic te an la kawl cheu a, mahse Endrick-a tan Real-a a teammate-te aiin nek chhuah an harsa lo zawk ang.

Amorim-a bakah hian an elpui AS Roma chuan Endrick hi an duh bawk a, Donyell Malen leh Paulo Dybala nei tho mah se Palmeiras forward hlui hi an duh. Thlasik transfer-ah Brazilian forward hian rimtu a ngah dawn.

Endrick hi international break atana Brazil squad-ah a tel a, October 3, Inrinni zana Salt Lake Stadium-a Selecao leh India inhmachhawn hunah pawh a tel ve dawn. Ancelotti leh a naute hian naktuk zing dar 3:30-ah Australia nen friendly match an khel ang.