Zanin dar 7-ah Aizawl FC vs MLS FC

Star Cement MPL13-ah Aizawl FC-in match hmasa pangaah an khingpui an sawp vek a, chung zingah chuan Lawngtlai club MLS FC pawh an tel. Coach R. Lalruatfela hote hian August 29, Inrinni khan MLS hi 5-2 in an sawp a, zanin dar 7:00 hian RG Stadium-ah an inkhel leh dawn.

Aizawl FC hian point 20 an hmuh tawh avangin semifinal an hnaih tawh a, knockout stage khel chiang turin Lawngtlai club an hneh hi a pawimawh dawn. Goal khung kawngah Aizawl FC-in harsatna an nei lo a, Zomuansanga'n goal 10 khung tawhin Laltlazova'n goal sarih a khung tawh bawk.

Player 10 dang T. Malsawmzuala (2), Vanlalramnghaka (2), PC Pazawna (2), K. Vanlalhriatzuala, Lalhruaitluanga, Stephen Lalrinfela, Vincent Lalduhawma, JH Remlala, Eric Remruatpuia Chhangte leh H. Lalruatfela ten goal an khung vek tawh. MLS tan pawh Aizawl laka point hlawh chhuak turin tlarhnung tih phui ṭhat a pawimawh ang.

Chutihrualin semifinal khelh beiseina nei MLS hi palinaah awm mek mah se an dinhmun a him lo. Aizawl FC-in hnehna chang ta se, Dinthar FC leh Ramthar Vengin hnehna an chan bawk chuan Lawngtlai club hi paruknaah an tla thei tlat. Coach F. Lalrozama hote tan result ṭha nei turin minute 90 rilru pek a pawimawh ang.

MLS hian match hnuhnung berah Mizoram Police an hmachhawn a, hun tawp dawnah ṭum khat an mutthluk zeuh avangin point an hlawh chhuak lo. Police aiin Aizawl FC khelh an harsa zawk dawn a, MLS tan ṭan mar pat a ṭul dawn a ni.