Pro Fight : Zan 13-na flyweight a pui

Mizoram Labour Link LPS Pro Fight 2026 zan 13-na chu Nilaini zan khan LPS, Arena Falkand-ah chhunzawm a ni a, bout 11 awm tura ruahmanah walk over pakhat a awm avangin inhnek 10 a awm.

Nilai zan inhnekah 'main event' tia sawi tur a awm lo a, mahse inhnek bul ṭantu flyweight inhnek chu hmuhnawm berah a chhal ngam. Flyweight-ah hian inhnek pathum awmin, technical knockout, split decision leh unanimous decicion hmuh tur a awm vek.

Inhnek hmasa berah Sialhawk boxer Michael Zosangliana'n Bungkawn boxer Tommy chu technical knockout hmangin a hneh a, match hmasa zawka Pro Fight a tawnhriat nei Lalthanzuala lo hneh tawhtu, Tommy-a'n beisei a pha lo a, TD Academy-a inzir Michael-a nawr na tak tuar loin a khel zui thei lo.

Bout hnihnaah Benjamin Lalthantluanga chu North Chawnpui boxer Lalṭhazuala lakah a vannei a, tharum ngah zawk Ṭhazuala'n na taka hnek tumin pan ṭhin mah se, Benjamin-a'n inven pahin a lo hnek let zeuh a, a tawpah Khatla East rawlthar hi split decision-a chakin a dingchang ta zawk.

Flyweight inhnek hnuhnung berah Thingsulthliah tlangval PC Laldinthara'n Manipur boxer Lalnunthlanga chu unanimous decision-in a hneh a, Dinthara'n round tin la vekin a chungnung zawkah a ṭang.

Hetihlai hian mipui ṭan rawn Vanlalmalsawmdawngliana a chak zo lo a, Saitlaw tlangval hian Myanmar boxer Auckchin Maung chu split decision-in a hneh lo. Saitlaw boxer hi a tirah che ṭha zawk mah se round tawp lamah a chau zawkah a ṭang a, uiawm takin a chak lo.