Boyka a inlan leh dawn ta

Mizoram Labour Link LPS Pro Fight 2026 zan 15-na chu zaninah ṭan leh a ni dawn a, mipuiin an hmuh châk Boyka Lalhriatsanga a inlan leh dawn. Lunglei Salem Veng boxer Franky H. Vanlalruatpuia nen an inhmachhawn dawn a, 'main event' tur a ni ang.

Vaitin boxer Boyka hi ṭum thum Pro Fight a telna a ni a, mahse a tel hnuhnun ber aṭanga kum sarih a liam tawh avangin a chak ring lo an awm a, ring chhungah Boyka a inlan loh rei tawh avangin a lo hran lo.

Mahse a match hmasa berah Boyka hian Ailawng boxer John Zonunsanga Royte chu unanimous decision-in a hneh a, Boyka hi a chak satliah mai lo a, a chungnung zawkah ṭang tluan zakin 'fighter of the night'-ah thlan a ni a, amah ringhleltute ka a hupsak chiang hle.

Chutihrualin Boyka hi a fitness a ṭha tawk lo tih a hmuh thei a, zanina a khingpui tur Franky aia a chauh hma chuan chak lohna chance lian tak a nei. Mahse Boyka hi VVV Boxing Gym, College Venga training mek a nih avangin zuam chi a ni dawn lo thung.

Boyka leh Franky te inhnek tur hi round of 16 a ni tawh a, quarterfinal luh inchuh inhnek a nih dawn avangin inhenk hmuhnawm tak leh boruak sang a beisei ngam.

Hei bakah hian Boyka hi Falkland Venga khawsa a ni a, inelna neihna hmun LPS Arena hi Falkland-a awm a nih bawk avangin ṭantu a ngah leh dawn a, 'home advantage' a nei thei dawn.

Lightweight-ah Lalrohlua Pautu a inlan leh dawn a, Kanan Veng tlangval hian East Lungdar boxer David Malsawmzela a hmachhawn dawn a, fight nghahlehawm zingah a tel pha.

Zuitea Academy-a inzir Rohlua hi a khawng ṭha a, pro fight a vawi khat telna ni mah se state games-ah pawh a lo inlan tawh bakah a inhnek hmasak zawk khan minute khat leh second 27-na lekah Bawngkawn boxer Chuauzika chu technical knockout-in a hneh tawh a, inrintawkna a neih san lai tak niin en bik a sual lo ang.