Italy tan kum chhia a ni – Toni

Italy striker hlui Luca Toni chuan kum 2026 chu Italy football tan kum chhia a nih thu a sawi a, rim taka thawka bul an ṭha lo a nih chuan ngai an awh tawh loh tur thu a sawi.

Kum 49 mi Toni chuan, "Italy tan chuan kum ṭha tih rual a ni lo. Tun aṭanga bul kan ṭan thar leh a nih loh chuan ngai kan awh leh tawh lo ang. Tun hnaiah chuan kum 2021-a Euro kan champion chiah kha thil lawmawm awmchhun a ni a, 2030 World Cup kan tling zo lo leh a nih chuan a aia tlakchhiatna hi a awm tawh lo ang," a ti.

Fiorentina striker hlui chuan sawi chhunzawmin, "Ka ngaihdanah chuan coach bakah hruaitu ṭha kan mamawh. Tun hnaiah player naupang zawk chher hriam leh enkawl lamah kan tlahniam hle a, coach ten an tihtur an ti tawk lo. Kan training neihna hmunah pawh hun bi neia hnathawkte hmuh tur an tam zawk," a ti bawk.

Italy hian 2014 hnuah World Cup an la khelh leh lo a, a zawnin football inelna sang bera ngaihah hian vawi thum an tling zo tawh lo. Kum 2021 khan Euro-ah champion ve zeuh mah se an chet ṭhatnain rei a daih lo a, kumin World Cup-ah pawh khan qualifying-ah Bosnia & Herzegovina an hneh loh avangin an khel lo.

Azzurri hian Euro 2020-a champion puitu Roberto Mancini an ko kir leh a, hemi chungchangah hian Toni chuan Italy tan a ṭhat tur thu a sawi bawk a, Mancini chu an ram team champion pui hnuhnung bertu a ni a, hotute nen an inhmuhthiam loh avanga a chhuah hnua a lo kir leh chu a lawm thu a sawi.

Toni hian international coach te bakah Serie A thlengin a sawi kai a, club hrang hrangin Italian player chhawr tam loa ram pawn mi kum upa tawh tak tak rinrawla an la hmang reng chu an ṭhanmawh pakhatah a ngai.

Tun season match ṭhenkhata Serie A club zinga lian pawl Juventus-in, bul ṭantu 11 zingah Italian player pakhat chiah an chhawr te chu thil dik a nih loh thu a sawi a, a dem hle.

Bayern Munich tan pawha khel tawh Toni chuan Italian rawltharte chungchang a sawi bawk a, Pio Esposito, Alphadjo Cisse te khelh ṭhat avangin beiseina thar a siamsak thung.

Nations League khelh mekah Italy hi group A-ah France, Belgium leh Turkey te nen an awm ho a, Europe-ah pawh ram lian zinga ngaih an awmpui avangin knockout stage inpetkai a awlsam dawn lo a, Mancini tan pressure a sang nghal.

Zanin dar 12:15 hian a bul ṭan nan Belgium nen an inhmachhawn dawn a, an khelhpui tur Belgium hi anmahni ang bawka indinthar tum ni mah se World Cup-ah khan quarterfinal an thleng a, Azzurri tan chak turin theihtawp an chhuah a ngai ang.