Alaba-a'n Udinese a zawm dawn

Serie A club Udinese chuan club nei loa awm mek David Alaba lak luh tumin hma an la a, he thu ziak i chhiar meuh chuan engkim a chiang tawh hial ang.

Kum 34 mi Alaba hian tun season tawp khan Real Madrid-a a contract a hmang zo a, Spanish club-in contract thar an zawrh loh avangin a duhna lam apiang a hawi thei.

Thla thum dawn club nei loa a awm hnuah Udinese an lo lang a, Austrian defender tawnhriat ngah hi an club a hruai luh ngei an tumruh hle a, an la lut thei a nih chuan Alaba tan Italian league a vawi khat khelhna tur a ni ang.

Alaba hian an ram club Austria Wien II-ah bul a ṭan hnuin 2009 khan Bayern Munich a zawm a, Bayern tan kum 12 khelin 2011 khan Bundesliga club tho Hoffenheim tan loan hmangin a khel zeuh.

German club-a a contract a zawh hnuah 2021 khan Real Madrid a zawm a, Carlo Ancelotti hnuaiah hmun pawimawh a chang. Mahse Alaba hi tun hnaiah hliamin a tlakbuak avangin a khel tam thei lo a, season hmasa pawh khan match 11 chiah a khel.

A kum tam ve deuh tawhin tun hma pha tawh lo mah se, Alaba hi kumin World Cup-ah khan an ram innghahna ber a la ni a, club tan champion theihna zawng zawngah a champion tawh bawk avangin Udinese-in an ṭangkaipui ang.