Sum vangin Saudi ka pan–Reijnders

Manchester City midfielder hlui Tijjani Reijnders chuan sum vanga Saudi Pro League a pan thu a sawi a, inkhelh a chawlhsan hunah rethei taka awm a duh loh thu a sawi bawk.

Kum 28 mi Reijnders chuan,"Sum um min ti a nih pawhin kei chuan ka hnial lo. A chhan chu inkhelh ka chawlhsan hunah rethei taka awma hnathawh ka duh tawh lo. Saudi-a contract ka ziah avang hian ka tute thlengin sumah an buai tawh dawn lo a, chutiang hun ṭha chu ka bawlhpelh phal lo a ni," a ti.

Dutch midfielder hian Al Qadsiah-ah kum nga daih contract a ziak a, kum khatah pound maktaduai 17.2 a hlawh dawn. A contract hi a hmang zo a nih chuan £86 mtd a hlawh pha dawn a, City-a kum khata a hlawh £12 mtd nen a inthlau hle.

Reijnders hian nikum khan AC Milan aṭangin City hi £46.5 mtd in a zawm a, Pep Guardiola hnuaiah match 50 a khel nghal. Mahse season khat lek hnuah a vanglaia Saudi a pan avangin dem a hlawh hle.

Zwolle midfielder hlui chuan sawi chhunzawmin, "Saudi hi kan ngaih ang a lo ni lo. Player thiam leh khawvel huapa hming langsar an awm nuk tawh a, a league hi Eredivisie aiin 'class' a sang hial ang.

He club enkawl mektu Brendan Rodgers-a'n min rawn bia a, Saudi-ah hian kum thum emaw kum li chhung ṭha takin ka khel thei a, a hnuah Europe-a kir leh zawk turin thu min rawn a, chu chu ka tum dan a ni," a ti.

Reijnders hian a club thar tan match nga aṭangin goal thum a khung tling der tawh a, Saudi pan mah se a khelh ṭhat avangin Netherlands coach thar Xavi-a'n Nations League khel turin a ko tel. Oranje hian nizan khan Germany an hmachhawn a, an result kan hre hman lo.