Eriksen-a'n Wolfsburg a chhuahsan

Christian Eriksen chuan a khelh mekna Wolfsburg-ah tun season chhung atan contract la nei mah se inhriatthiam tawnnain a titawp a, German club hi a chhuahsan nghal.

Kum 34 mi Eriksen chuan, "Tun dinhmunah chuan Denmark-a ka chhungte bula awm hi ka tan a pawimawh ber a, club-a ka thawhpuite nen kan inhrethiam hi ka lawm takzet a ni.

Wolfsburg-ah hian thil tam tak ka tawng a, hun hlimawm leh lungngaihthlak a inpawlh nuk mai. Bundesliga-a kir leh turin dinhmun ṭha takah an awm mekin ka hria a, tun aṭanga reiloteah an la hlawhtling thuai dawn tih ka chiang. Wolfsburg fans chungah lawmthu ka sawi a, in tana khelh hi nuam ka ti a, he hun hi ka hre reng tawh ang," tiin a thlah.

Denmark tan vawi 151 inlan tawh midfielder hian season hmasa khan Wolfsburg tan match 33 khelin goal thum leh assist pakua a la nei thei a, a kum tam ve deuh tawhin a hriselna tlahniam deuh mah se a thiam a la theihnghilh lo. Chutihrualin German club relegate tur a chhanchhuak zo lo thung.

Danish midfielder hi kumin June thla khan Ukraine nen friendly match an khelh ṭumin minute 65-naah a tlu a, inkhel tihtawp zui nghal niin Eriksen erawh a ngaihtuahawm loh.

Tottenham Hotspur midfielder hlui hi Euro 2020 khan Finland nen an inkhelh ṭumin a lo tlu tawh a, Eriksen hian inelna khel chhunzawm thei loin thla riat chhung zet a chawlh zui.

Khatih laia Inter Milan tana khel Eriksen hian a lung phut dan thunun turin 'implantable cardioverter defibrillator' (ICD) vuah a mamawh a, mahse Serie A-ah phal a nih loh avangin a chhuak a, Premier League kai thar Brentford a zawm.

Bees tan a khelh ṭhat avangin 2022 khan Man United-in an la lut a, Erik Ten Hag-a hnuaiah hmun pawimawh a chang. Old Trafford-ah kum thum a châm chhungin League Cup leh FA Cup-ah United champion puiin nikum June khan a chhuahsan.

Ajax tan pawha khel tawh Eriksen hi Nations League khelh mekah Denmark tan koh zingah a tel ve lo a, Red & White (Denmark sawina) hi nizan khan Norway nen an inkhel a, result kan hre hman lo.