Real-in Bellingham thlun ngheh tum

English midfielder Jude Bellingham chuan contract thar a ziak dawn a, Real Madrid chuan an midfielder pawimawh hi contract thar an zawrh thuai dawn niin khawthlang chanchinbute chuan an tarlang.

Kum 23 mi Bellingham hian 2023 khan Borussia Dortmund aṭangin Real hi a zawm a, kum ruk daih contract a ziah nghal. Bellingham hian kum thum daih la nei mah se Los Blancos chuan thlun ngheh an tum a, a contract nei lai bakah kum khat emaw kum hnih châm turin an duh.

Bellingham hian a contract neih mekah Real tan kar khatah €480,769 a hlawh a, contract thar a ziak a nih chuan kum 2030 emaw 2031 daih a ni tawh dawn a, a hlawh a pun ngei a rinawm.

Dortmund midfielder hlui hian Real tan match 148 a khel tawh a, goal 49 leh assist 36 a nei tawh a, tun season-ah pawh match sarih aṭangin goal thum leh assist pahnih a nei leh der tawh.

Spanish club lian hian an player pawimawhte chân an hlau hle a, season ṭan dawn khan Vinicius Junior chu 2032 thleng cham turin an lo thlung nghet tawh a, Bellingham bakah Kylian Mbappe pawh contract thar zawrh an tum nia sawi a awm bawk.

Nations League khelh mekah Bellingham hi Thomas Tuchel-a'n England tan a ko a, mahse September 20, Pathianni zana Madrid derby an khelhah hliam tenau a neih avangin a inlan nghal a beiseiawm loh.