Zanin dar 7-ah Ramthar Veng vs Saikhamakawn

Star Cement MPL13-ah zanin dar 7:00 hian parukna Ramthar Veng leh pasarihna Saikhamakawn te an inkhel dawn a, team pahnih hi point hnih chauha an inthlauh avangin inkhel hi a pawimawh hle. Zanin result hian team dinhmun a hril dawn a, semifinal khel tur zawnna leh relegation battle-a tel thei ve ve an la ni.

Ramthar Veng hi MPL club thar an ni a, an squad neih dan thlirin inelna ṭan hma aṭanga semifinal beisei ngam tur an ni. Mahse, MPL boruak sangah chak an harsat avangin paruknaah an awm mek.

HC Zarzoliana hote hian MPL13-ah zanina an hmachhawn tur Saikhamakawn chauh hi an la hneh a, chutihrualin MLS FC, Mizoram Police, Chanmari FC leh Kanan lakah point khat ṭheuh an hlawh chhuak tawh.

Ramthar Veng tan Armed Veng South winger J. Lalbiakliana (Valpuia) awm hnuah an goal bawh a na sawt a, mah se goal khungtu bik an nei lo. MPL13-ah goal kua an khung tawh a, Valpuia'n goal hnih khungin goal riat dang hi player pariat khung a ni.

Saikhamakawn hi hliam vangin an talbuai a, vawi li ngawt an chak tawh loh avangin team boruak a ṭha tawk lo. SKK hian match hnuhnung berah table mawngphaha awm Kanan FC an hmachhawn chungin 5-2 in an chak lo.

A êng zawnga thlir erawh chuan SKK hi vawi hnih an chak tawh avangin point ruk an hmu a, Ramthar Veng aiin point khat chauhin an hmu tlem zawk a, round 8 zawha palinaa awm MLS ai pawhin point li chauhin an hmu tlem zawk. Saikhamakawn tan result ṭha nei turin tlarhma lama awm Lalrothlanga leh Vanlalthlanga te goal hmaa an hriam a pawimawh a, tun inelnaa goal nga khung tawhtu K. Lalremmuana a chet ṭhat a ṭul bawk ang.