NE Regional Muaythai C'ship-ah Mizoram an champion

North East Regional Muaythai Championship (NERMC) 2026-ah Mizoramin gold 40, silver 13 leh bronze pakua lain a pumpuiah an champion. Inelna hi Mizoramin an thleng a, R.Dengthuama Multipurpose Hall, Mualpuiah September 22-24, 2026 chhung khan neih a ni.

Muaythai C'ship-ah hian India hmarchhak state pariat Mizoram, Meghalaya, Tripura, Assam, Manipur, Nagaland, Sikkim leh Arunachal Pradesh te an tel vek.

Inelna khar zan hian Mizoram chief minister Lalduhoma chu khuallian a ni a; Lalmuanpuia Punte, MLA, Adviser to CM, Gavin Miguel Mylliem, MLA, Meghalaya leh Ram Choudhary, General Secretary, United Muaythai Association of India te chu khualzahawm an ni.

Khuallian Lalduhoma chuan, "Muaythai hi kut inthlaka infiamna (contact sports) hlauhawm ber pawl leh tunlai khawvela lar ber pawl a ni a. Olympic Sports Discipline la ni chiah lo mah se eizawnna tlak infiamna a ni tawh a, Mizo tlangval Nazareth Lalthazuala pawhin ONE Championship-ah contract ṭha tawk tak a nei tawh a ni," tiin a sawi a, Mizote tan theihna neihna lama kal a finthlak thu a sawi tel bawk.

NE Regional Muaythai Championship-ah hian player 350 an fuan khawm. Inelna thlengtu Mizoram an champion a, pahnihna Meghalaya chuan gold 23, silver 15 leh bronze 10 an dawng a, pathumna Tripura State chuan gold 18, silver 12 leh bronze 19 an dawng ve bawk.