Jerry-a goal hmangin Dinthar an chak

Aizawl West Derby-ah nimin tlai khan Dinthar FC leh Kanan FC te an inkhel a, injury time-a Jerry Lalchhanchhuaha goal hmangin Maimawms-in 2-1 in hnehna an chang. Star Cement MPL13-ah Dinthar FC-in match riat aṭanga point 12 hmuin palinaah an inhlangkai a, nizana Aizawl FC leh MLS FC inkhel result a zirin table hi a la danglam thei thung.

RG Stadium-a inkhelah team pahnih an inhnehtawk a, Kanan lamin bul an ṭan ṭha zawk. Team pahnih finishing a ṭha tawk lo a, first half-ah goal hmuh tur a awm lo a, goalkeeper pahnihin hna an nei meuh lo. Second half-ah Kananin K. Lalhminghluta (Vala) leh Jerry Lalchhanchhuaha te an luhtir hnuah goal an khung chauh.

Chutihrualin Vala'n goal a khung hmain Malsawmzela'n goal khungna remchang a nei a, a hun ṭha neih a hmang ṭangkai thei lo. Substitute Vala erawh box chhung buai nuaih karah kawh zetin minute 75-naah a pet lut. Minute 87-naah substitute Lalthanpuia (Tepuia) freekick pet chu laklawh lai taka a sawh avangin keeper J. Lalchhuanliana'n a ti per a, hnai tak aṭangin Kanan midfielder Lalthlanawma'n a khung.

Aizawl West Derby-ah chak zawk awm lo turah ngaih ni tawh mah se Dintharin tum dang an nei a, na takin an nawr chhunzawm. Malsawmhlua'n hnai tak aṭangin tauh lut lo mah se box pawn chiah aṭangin Jerry-a'n goal kilah tak a pet lut a, Dinthar 2-1 in an chak. I Day Football-ah Kanan FC-in Dinthar FC hneh mah se MPL-ah erawh Maimawms-in ṭum hnih an hneh a, technical director K. Malsawmkima'n semifinal an khelh tur thu a sawi lawk chu, a tak ngeia thleng thei turin kawng dik an zawh.