Klopp-a Germany = Xavi-a 'Spain'

Jurgen Klopp-a kaihhruai Germany thawm a ring viau mah se Ningani zana an match hmasa berah Xavi kaihhruai Netherlands nen 1-1 in an inhnehtawk. Armsterdam-a inkhelah Germany tan Felix Nmecha-a'n goal khung hmasa mah se injury time-ah mualneitu tan Cody Gakpo-a'n a sut.

Germany manager Klopp-a'n player a ko tam a, tun ṭum international break-ah atan team hnih a siam. Oranje lakah Marc-André ter Stegen-a'n keeper hna rawn chelh lehin Freiburg right back Philipp Treu-a'n a vawi khat nan ram tan bul a ṭan a, player dangte erawh ram tana inlan tawh an ni hlawm.

Xavi erawhin thil danglam a ti ve lo a, Germany hmachhawn turin a player neih ṭhat 11 a hmang thei thung. Ṭan phat aṭangin Klopp-a naute an nung nghal a, goal hmaah Xavi naute a hlauhawm zawk.

Box pawn chiahah Brian Brobbey an ti tlu a, box chhungah Jonathan kutah ball-in an per zui a, Germany tlarhnung a nghing. Oranje hian captain Virgil van Dijk hmangin goal khung hmasaah an inngai a, mah se VAR hmanga ennawn hnuah Ter Stegen-a daltu an awm avangin pawm a ni lo - Klopp-a hote an vannei.

Chutihrualin Klopp-a hnuaia Germany khelh dan a danglam a, inrintawkna nen ball an inpe kual. Minute 32-naah Felix Nmecha hmangin Germany an khung hmasa a, Brobbey inhliam laia goal lut a nih avangin Oranje lam an lawm lo. Karim Adeyemi-a'n chance ṭha dang an nei a, goal ruakah a khung lo.

Second half-ah Netherlands goal bawh a na nghal a, Denzel Dumfries-a'n hnai tak aṭangin a khung lo a, Mexx Meerdink khung tur Ter Stegen-a'n a dang. Oranje-in an nawr chhunzawm a, Meerdink-a'n goal ruak a khung lo. Mark van Bommel-a fapa kum 22 mi Ruben van Bommel pawhin keeper tan hna a rawn siam a, Germany an bet hle.

A tawpah Germany an ṭang tluan thei lo a, Gakpo-a'n sihurh a sut a, Liverpool forward finishing a ṭhat ang bawkin a petu Ruben van Bommel a fakawm bawk. Armsterdam-ah Germany hian September 27, Pathianni zan dar 12:15-ah Greece an hmachhawn ang a, Oranje te hian Pathianni zan dar 9:30-ah Serbia an hmachhawn thung ang. Inkhel dangah Greece hian 2-1 in Serbia hi an hneh a ni.