Pro Fight: Boxer hmuhnawm Ruatkima inlan zan

Mizoram Labour Link LPS Pro Fight 2026 zan 16-na chu zaninah neih a ni leh dawn a, bout 12 awm tura ruahmanah 'main event' tia sawi tur awm lo mah se Lalruatkima a inlan leh dawn a, inhnek hmuhnawm a chhawpchhuah leh a rinawm.

Falkland boxer Rka hian September 19, Inrinni zan khan unanimous decision-in Malsawmdawngliana, Dawrpui Vengthar a lo hneh tawh a, hemi zan hian fighter of the night lawmman dawngin a langsar ber.

A inhnek hmasa zawkah Rka hian a fitness a ṭha tih lantirin a khingpui a nawr tluan zak a, a hnek chhuak hnem bawk avangin a khelh dan chu mipuiin hmuhnawm an ti.

Falkland veng tlangval hi a vawi khat Pro Fight telna chauh ni mah se MMA, Kickboxing leh Muaythai lamah sulhnu a lo neih tawh avangin ring chhungah a tlangnel nghal. An vengah inelna hi neih a nih bawk avangin fans a ngah fal a, 'home advantage' a nei ṭha hle.

Rka hian North East Regional Muaythai Championship 2026-ah tel bawkin, inelna an neih zawh takah khan gold medal a hlawh chhuak bawk a, inrintawkna a ngah leh sawt ang.

Elite Gym leh Boxing Hub-ah Rka hian training a nei mek a, Laldinsanga'n a kalsan tak bantamweight champion kawnghren hlawh chhuak turin theihna sang tak a nei a - mipui rinkai zingah a tel der tawh.

Chutihrualin a hmachhawn tur Lalhmangaihkima a duai bik lo a, Salem Veng boxer hian Lengte tlangval Lalbiaknawia chu unanimous decision-in a lo hneh tawh a, Falkland boxer lakah rinkai zawk ni lo mah se, barakhaih thei turin theihna sang tak a nei a ni.

Pro Fight hi LPS Arena, Falkland-ah neih a ni a, a hmunah Rs. 50 chawiin a en theih. LPS YouTube channel-ah member tan a en theih bawk a, member nih man hi Rs. 179 a ni.