Ropui takin Hruaia a lo kir

Mizoram Labour Link LPS Pro Fight 2026 zan 14-na chu Ningani zan khan LPS Arena, Falkland-ah neih chhunzawm a ni a, champion title pawh lo kawl tawh C. Lalhruaitluanga ropui takin a rawn kir a, Vanlalsanga a knockout nghal.

Hei le Hruaia

Ningani zan inhnekah hian zan dang aiin a tawp khartu mipui an ṭha a, a chhan chu Hruaia a inhnek dawn vang a ni. Hruaia bakah Vanlalsanga'n ṭantu a ngah a, an inhnek hma hauh aṭangin boruak a nung nghal.

Inhnek an ṭan aṭangin Hruaia a phur a, Chawngtlai boxer hian hlauhthawnna nei loin a khingpui a pan nghal ngar ngar. Chutihrualin Suangpuilawn tlangval Vanlalsanga a che ṭha thawkhat a, Hruaia luah a hnek fuh hnem hle.

Hruaia'n Vanlalsanga luah a hnek ve meuh lo a, mahse a nakah leh a duh lam a hnek hnem thung. Hruaia hnek fuh chhunah a kutthlak a na a, mahse Vanlalsanga'n round khatna a khelh tluanpui.

Mahse second round-ah Vanlalsanga a tlahniam hret a, Hruaia'n a naka a hnek na tak chu tuar loin a tlu. Dinchhuah leh tum mah se ṭhu leh nghal hnawkin a khelh chhunzawm thei lo a, Chawngtlai boxer Hruaia a chak a, quarterfinal a lut.

Beiseina

Kum 2022 khan welterweight-ah Hruaia hi a champion a, 2023 khan weight sang zawk middle-ah insawnin title fight-ah F. Lalthanliana Junior hnehin weight hrang pahnihah a champion.

A vawi khatna atan a zawna middle champion nih a tumna erawh a tihlawhtling zo lo a, 2024 khan a lo hneh tawh Lunglei Electric Veng boxer Thanliana nen intawng lehin a chak zo lo. Thanliana hnen aṭangin champion kawnghren chhuhsak ngei tumin kuminah tha tharin a lo kir a, Thanliana el pha ber tura ngaih a ni.

Robert-a a ṭha

Lightweight inhnek hmuhnawm bik a awm bawk a, Tuipui Ferry boxer LV Robert Lalengliana khel 'class' tak chuan sawi zui a hlawh hle. Robert-a hian vawi hnih lo chak tawh Manipur boxer Thangboi chu unanimous decision-in a hneh.

Robert-a hi an inhnek chhung zawngin a chungnung zawkah a ṭang tluan zak a, tharum a ngah bakah a fitness a ṭhat avangin Thangboi-a'n a ngam meuh lo. Judge pathumin 30-27 a chaktir vekin a vawi thum nan Robert-a a chak.

Chawnpui Venga khawsa mek Robert hi round of 16 lutin, September 29 Thawhlehni zan hian seeded boxer zinga mi New Vervek boxer Micky Lalbiakzuala nen an inhmachhawn dawn.

Kum 21 mi Robert-a hi Pro Fight a vawi khat telna a ni a, mahse State level-ah Bronze medal a lo hnek chhuak tawh a, Origin Gym-ah a inzir bawk avangin inrintawkna a ngah bakah Pro Fight a vawi khat telna tih hriat loh khawpa ṭhain a hnek a hmuhnawm a, a hmabak a êng hle.