Chanchin ngah Ireland chak lo nghal

Tun hnaia chanchin ngah tak Republic of Ireland chuan UEFA Nations League-a an match hmasa berah Kosovo an ngam lo nghal a, Ningani zan khan Vedat Muriqi-a goal hmangin Kosovo an chak. Ireland-in a chhanletna tur an nei ve lo.

Fadil Vokrri Stadium, Kosovo-a inkhelah mikhual team Ireland an bet deuh zawk a, Kosovo-in ball an chang hnem zawk. Kumin March thlaa World Cup playoff an khelh hnua an match hmasa berah Ireland-in beisei an pha lo a, inkhelh chhung zawngin goal zawnah vawi khat chiah an pet thei a ni.

Team pahnihte danglamna erawh kum 32 mi Muriqi a ni. Fenerbahce forward hian minute 83-naah Ermal Krasniqi-a crossbar pet per let chu a tauh lut a, Kosovo chak nan a tawk.

Ireland coach Heimir Hallgrimsson chuan, "Kosovo khan chak an phu zawk a, an khelh dan kha kan zirchiang nasa a, mahse kan player-te khelh chhiat ni kan tawng a ni," a ti.

Nations League ṭan hma aṭang tawhin Ireland hian khelmual pawnah buaina an ngah a, an coach Hallgrimsson-a thilsawi vangin Israel nen ṭawngkamin an lo inchhang tawh.

Kum 59 mi Hallgrimsson hian squad a puan laiin, "Israel nen kan inkhel dawn lo, kan hmachhawn dawn zawk. Hnam anga indo kan khelhpui dawn lo, kan hmachhawn dawn zawk," a ti.

He a thilsawi vang hian Israel an lawm lo a, an ngawi mai mai bik lo. Ireland coach thusawi chu 'âtna leh lemchanna' tiin demna thu an lo chhuah tawh. Ram pahnih inkar boruak a ṭhat loh vangin an inkhelh tur chu duh lotu an tam hle.

Hetiang boruak karah hian Ireland an chak loh nghal avangin pressure a sang sawt dawn a, September 27, Pathianni zan hian Israel an hmachhawn dawn zui. Khelmual pawna an chanchin avangin ram pahnihte inkhel hian ngaihven a hlawh ang.