Celebrate dan vangin Israel player hnawtchhuak

Ningani zan Nations League inkhelah Israel chuan 3-1 in Austria an hneh lo a, sawizui hlawh ber erawh Israel forward Sayed Abu Farhi goal lawm dan vanga an hnawtchhuak chu a ni.

Raiffeisen Arena, Austria-a inkhelah Romano Schmid-a'n first half tawp hma hretin penalty hmangin an hmahruaina goal a khung a, minute 55-naah Abu Farhi-a'n a sut a, ennawm a inṭan nghal.

Kum 20 mi forward hian an siphurh a sut hnuah hian corner flag chu phawiin, silai kâp angin a goal khung a lawm. Mahse referee Georgi Kabakov-a'n yellow card a pe a, yellow card pakhat a lo hmuh tawh avangin hnawhchhuah a ni zui.

Player kim loa an khelh hnuah Israel an inveng tluan teuh a, hun tawp hma hretin Austria tan Phillipp Mwene leh Sasa Kalajdzic ten goal khung belhin a tlawm zawkah an ṭang.

IFAB Law 12-naah player chuan goal khung an lawm danah midang thinrimna cho chhuak thei bakah, tharum thawhna lam kaihhnawih a tel a nih chuan hrem theih a ni tih a tarlang a, Abu Farhi-a hnawhchhuah a nih danah Israel lawm lo viau mah se referee-in thil dik tak a ti.

Israel hi group G-ah awmin Austria bakah Kosovo leh Republic of Ireland te nen an awm ho a, Ireland chak zo lo ve tho mah se an goal difference a chhiat zawk avangin Israel hi table mawngphahah an awm mek.

Sky Blue & Whites (Israel sawina) hi Ireland nen khelmual pawna chanchin nei lai an nih avangin ngaihven an hlawh a, Ireland lam infiammi tam takin hmachhawn duh lo mah se Pathianni zan hian an intawng dawn.

Buaina tam zawk pumpelh a nih theih nan ram pahnihte hi an ramah an inkhel dawn lo ve ve a, Hungary leh Serbia-ah an inkhel dawn. Pathianni zan hian Hungary-ah an inkhel dawn a, Israel tan home match tur a ni ang. October 4, Pathianni zanah Ireland-in home atan Serbia an hmang ve thung ang.