Ballon d'Or nominee-a tel Kvaratskhelia a lawm

Paris Saint-Germain forward Khvicha Kvaratskhelia chuan, Ballon d'Or dawng thei tur hming an chhawpchhuah 30 zinga a lang ve thei chu a lawm thu a sawi a, nominee-a a tel ringawt pawh chu a tan thil ropui tak a nih thu a sawi.

Kum 25 mi Kvaratskhelia chuan, "Ballon d'Or dawng thei tur zinga ka hming a lang ve ringawt pawh hi kan tan chuan chawimawina a ni. Season hmasa khan ka che ṭha thawkhatin ka inhria a, mahse hetiang hi ka beisei pha lo.

Kan ram tê tak Georgia tana ka khel thei hi ka lawm bawk a, ram lian lo tak aṭanga naupang seiliante pawhin thui tak an thleng thei tih hi an hre tur a ni," a ti.

Kvaratskhelia hian season hmasa khan inelna hrang hrangah match 48 khelin goal 19 leh assist 11 a nei a, PSG chu Ligue 1 leh Champions League-ah a champion pui a, Europe-a forward che ṭha ber zinga mi a ni.

Kumin Ballon d'Or hi October 26-ah London Palladium Theatre-ah sem a ni dawn a, dawng tur zingah Harry Kane leh Lamine Yamal te hming a langsar a, Lionel Messi hming a la ri tel bawk.

Nations League khelh mekah Kvaratskhelia hi an ram captain niin group F-ah Hungary, Northern Ireland leh Ukraine te nen an awm ho. Nizan khan Northern Ireland nen an inhmachhawn a, an result kan hre hman lo.