NBA MVP hmasa ber a thi

NBA chanchina Most Valuable Player (MVP) lawmman la hmasa ber Bob Pettit chu Ningani zan khan Metairie, Louisiana-a an chenna inah a thi a, kum 93 mi hi a thih chhan tarlan a ni lo.

American basketballer hi 1954 khan Milwaukee Hawks, tuna Atlanta Hawks ni ta hian NBA draft-ah an club-a khel turin an thlang chhuak a, Rookie of the Year-ah thlan nghal niin Hawks-ah hian a career tawp thlengin a khel zui.

NBA-a a season hnihnaah hian MVP atan thlan niin, 1959 khan a vawi hnih nan a dawng leh bawk. 1958 khan Hawks chu a champion pui a, hei hi a career-a nomawi a chawi awmchhun a ni.

NBA-a kum 11 a khelh chhungin Pettit hi player ṭha bik a ni a, All Star-ah vawi 11 thlan a ni a, All Star game-ah MVP vawi li lai a ni thei. Season khata point score hnem ber ṭum hnih a ni thei a, rebound la hnem ber vawi khat a ni bawk.

A career chhung zawngin point 20,880, rebound 12,849 leh assist 2,369 a nei thei a, NBA-a point 20,000 nei tling hmasa ber a ni nghe nghe. A jersey hak ṭhin no. 9 chu Hawks hian midang hak theih tawh loh turin an retire hial.

College a kal laia a khelhna Louisiana State University (LSU) chuan thuchhuah siamin, "Pettit hian power forward khelh dan tur dik takin a khel ṭhin a, record khum leh harsa tak tak tur siam bawkin basketball tan a hlu takzet," tiin an website-ah an ui thu an tarlang. LSU hian Pettit-a hak ṭhin jersey no. 50 chu an retire ve bawk.