McTominay tel loa khel tur Scotland

Napoli midfielder Scott McTominay chu hlawhtling taka zai a nih aṭanga kar hnih a chawlh hnuah training a zawm leh tawh a, chutihrualin inkhel tura a la inpeih loh avangin a tel loin Scotland-in Nations League group stage an khelh a ngai dawn.

Kum 29 mi McTominay hi tun thla tir lam khan a lung phut dan a pangngai lo (mild benign arrhythmia) tih an hmuhchhuak a, a rang thei ang bera zai nghal niin hlawhtling taka zai a ni.

Scottish midfielder hi a lo kir leh hun chiang lo mah se, Napoli chuan kar hnih a chawlh hnuah training a zawm tur thu leh international break hnuah a inkhelh leh theih tur thu an lo sawi tawh.

Manchester United midfielder hlui hian tun season match hnih an khelh tawhah bul a la ṭan ve ve a, Nations League group stage a khel lo tur hi Scotland tan channa nasa tak a tling.

Scotland hi coach thar Sebastien Pocognoli hnuaia a vawi khat nan an inlan dawn a, naktuk zan dar 6:30-ah Slovenia an hmachhawn dawn. Scotland a enkawl hmasak berna turah Pocognoli chuan a zam thu a sawi.

Kum 39 mi Pocognoli chuan, "Zep lo chuan ka zam a lawm, mahse ka zam dan hi hlauhthawn vang ni loin phur vang a ni thung. Mawhphurhna lian tak ka nei a, khelmual sira team enkawl ka châk tawh takzet," a ti.

Belgian defender hlui hian ram tana la inlan ngai lo pariat zet a ko a, kum naupang tak tak an la nih hlawm avangin rinhlelhna a nasa hle. Tartan Army (Scotland sawina) hi a chet ṭhatpui nghal lo a nih chuan sawiselna a tawk nasa nghal ang.