Ngaihven hlawh Azerbaijan GP

Formula 1 season hman mek boruak a sang zel a, vawiin tlai dar 4:30 hian Azerbaijan Grand Prix neih chhunzawm leh a ni dawn. Intlansiak piah lama boruak dang a neih ṭhin avangin mipui ngaihven a hlawh leh ang.

Azerbaijan GP racetrack Baku-ah hian 2016 aṭang khan F1 an tlan ṭan a, hemi ṭum hian European Grand Prix tia koh niin a kum leh aṭangin Azerbaijan GP tia thlak a ni.

Baku track hi khawpui hlui kulh bangin a hual vel a, Caspian tuipui bul lawka awm a nih bawk avangin hmun dang aiin a dan a dang. Turn 8 aṭanga turn 10 hi kawng chho niin Baku khawpui hlui, Icheri Sheher kulh bang hlui inkarah tlan tlang a ngai.

He hmun hi F1 intlansiakna hmunah chuan kawng zim berte zinga mi a ni a, driver ten tihsual an neih chuan insiamṭhatna hun leh hmun an neih tlem ṭhin avangin, chona angah ngaiin driver ṭha leh ṭha lo hriatna hmunah an ngai bawk.

Kum 2019 qualifying neih a nih ṭum khan Charles Leclerc-a'n buaina a lo tawk tawh a, turn 8-ah bang a sut hnuin Ferrari driver hi a chesual a, hemi ṭum hian red flag vawi hnih zet tarchhuah a ni a, Leclerc bakah Robert Kubica an chetsual ve ve vang a ni.

Thil hlauhawm hian kulh leh a chheh velah ringawt a tawp lo a, hmun ṭhenkhat chak taka tlan laia brake an hman nat lutuk avanga chetsualna a awm ṭhin bawk.

Kuminah Mercedes driver pahnih Andrea Kimi Antonelli leh George Russell ten drivers table-ah hma an hruai a, an chetsual hun driver dangin an châng ṭhup. Chuvangin kumin Azerbaijan GP-in ngaihven a hlawh lehzual ang.