Nike-in Benzema thawhpui dawn lo

French forward Karim Benzema chu Nike nen thawhdun tum mah se, hun tep ter tawh takah Nike-in hun kal tawha Benzema chanchin duhawm lo avangin an thawhpui leh duh lo.

Kum 38 mi Benzema hi Adidas nena an contract chu tun thla khan a tawp a, Nike nen thawhho tumin inbiakna an nei zui nghal. Mahse Nike hian Benzema chanchin chu uluk zawkin an zirchiang leh hmasa a, shooting nei tura an inbuatsaih laiin Nike hian Real Madrid forward hlui hi an thawhpui duh leh lo.

Khawthlang chanchinbute tarlan danin Benzema nena thawhho an duh leh loh chhan hi, France tana a khelhpui ṭhin Mathieu Valbuena sex tape video hmanga vaunaah thubuai a neih tawh vang a ni.

He buaina chhuah tirh lai khan Benzema hi France National team pawhin hun eng emaw chhung chu an ko lo a, 2018 World Cup champion squad-ah pawh khan a tel ve lo.

Kum 2021 khan Benzema hi thiam loh chantirin kum khat lungin tang tura tih a nih bakah €75,000 chawi tura hrem a ni a, mahse a chung thu reltu judge-in jail tang tura a hremna hi a sut leh thung.

Lyon-a a career bul a ṭan lai khan Benzema hian Nike ballboot a bun ṭhin a, kum 2007 khan Adidas boot bun ṭanin a career-a hun tam zawkah German company nen an thawkho. Kum 2022-a Ballon d'Or a dawn hnuah khan Adidas hian ama pualin boot an siamsak hial.

Khelmual pawnah buaina nei mah se Benzema khelh dan a nghawng lo a, Santiago Bernabeu-a kum 14 a awm chhungin Champions League vawi nga a champion a, Ballon d'Or a dawng nghe nghe.

Hemi hnu hian Europe chhuahsanin Saudi Pro League club Al Ittihad leh Al Hilal tan a khel a, thla hmasa khan Al Hilal-a a contract tawpin tun thlengin club nei loin a la awm mek.

Benzema aiawhte chuan Nike zawk hian French forward hi an rawn be hmasa a, chumi aṭanga inbiakna kal zui zel a nih thu an sawi a, Benzema-a'n Nike a biak hmasak loh thu an sawi ve bawk.