Aizawl FC chakna Vincent-a goal

Star Cement MPL13-ah Aizawl FC-in Zirtawpni zan khan Vincent Lalduhawma goal hmangin MLS FC 1-0 in an hneh a, table chung berah dinhmun an sawhnghet. MLS erawhin point an hlawh chhuah zawh loh avangin panganaah an awm a, semifinal khel pha chin aṭangin an tla thla.

RG Stadium-a inkhelah ṭan phat aṭangin inkhel a nung ṭha, Aizawl FC-in Zomuansanga bench-ah dah mah se K. Vanlalhriatzuala hmangin goal chance an insiam hmasa zawk. Chutihrualin K. Lalhmangaihkima'n Aizawl FC keeper Vanlalhriatpuia rawn chhuak hmuin hla tak aṭangin a pet khum teuh hle.

Aizawl FC tlarhama awm Vincent, Vanlalramnghaka leh Laltlanzova ten MLS keeper Vanalthlamuanpuia an paltlang thei lo. Second half-ah AFC-in chak an mamawh tih an hria a, Mizo striker ṭha bench aṭangin Zomuansanga duh thala chevel turin an chhuah.

AFC goal bawh a na sawt a, minute 73-naah Vincent hmangin goal an khung. K. Hriata ball pek chu Vincent-a'n box chhungah dam dapin a la thla a, ṭha zetin goal-ah a khung. MLS tlarhnung dem theih an ni lo a, AFC midfielder K. Hriata leh forward Vincent te class sanzia a lang.

Vincent-a'n chance ṭha nei leh mah se a khung thei tawh lo a, Zomuana pawhin goal a khung thei chuang lo. Khawbel tlangval hian a zawnin match hnihah a khung tawh lo a, chutihrualin tun ṭum inelnaah goal 10 a khung tawh.