Chanmari FC-in Police an hneh

Star Cement MPL13-ah champion lai Chanmari FC-in Inrinni tlai khan Mizoram Police 2-1 in an hneh a, Rochhingpuia hoten inkhel pawimawha hnehna an chan avangin table-ah pahnihnaah an awm. Police erawh pathumnaah an tla thla thung.

RG Stadium-a inkhelah Chhinga'n player pawimawh Aron Vanlalrinchhana leh Lalthanzuala te a chhawr thei lo a, goalkeeper Zothanmawia aiah Tata Trusts COE chhuak Lalhruaitluanga a luhtir bawk. Police starting XI-ah erawh thil danglam vak a awm lo a, Lalramtluanga aiah Malsawmfela'n bul a rawn ṭan thung.

Team pahnih chak tumin theihtawp an chhuah a, chutihrualin club lian pahnih inkhelah beisei angin inkhel a mumal tawk lo. Minute 40-naah Mesak C. Lalrinngheta'n box pawn aṭangin a khung a, Police goalkeeper F. Lalmuanawma'n a dang hman lo. Police defender-ten Muanawma hi an hliah a, a thlen nawn tawh loh nan coaching staff lam tan inzir belh tur a awmah a ngaih theih.

Police tan chanchin duhawm lo a thleng zui a, midfielder ṭha R. Malsawmtluanga'n a kut a delh sual avangin lak chhuah a ngai a, a chawlh rei a ṭul dawn.

Second half-ah Chanmari forward Tharpuia'n Police defender Lalruatpuia kut a pet per a, Amuana'n minute 67-naah penalty hi goal-ah a chantir. Goal hnih khung hnuah inkhel a nung chhunzawm zel.

Police midfielder Lalbiakhlua'n (Hlutea) mawi zetin minute 88-naah freekick aṭangin khung a, beiseina thar an neih phah. Hun tawp thlengin inkhel a nung a, Chanmari ṭang tluanin 2-1 in hnehna an chang.