Man City-in thiam loh an chang, hmabak a thim!

Manchester City-in Premier League financial regulations bawhchhia an puhna 115 zinga 114-ah thiam loh an chang niin khawthlang media-ten an tarlang a, hremna na tak hmachhawn thei dinhmunah an ding. Chutihrualin City hian thutlukna hi an khinglet ngei tura ngaih a ni.

Hemi chungchanga Premier League leh Man City te court hmaah inbeihna thutlukna hi official-a puanzar a la ni lo a, chutihrualin thuthang satliah ni loin City hi thiam loh an chang ngei tura ngaih theih.

City thupuangtu chuan, "Premier League kalphung kalpui lai mekah hian thil pawimawh tak tak tihfel hmabak a la awm a, thuruk vawn him tlat tur a nih avangin Manchester City FC dinhmun chu February 2023-a club thuchhuah siam nen khan a la ngai reng a ni.

“Premier League board leh executive-te chu lamṭang bik nei lo, duhsak zawng awm miah lo leh dik taka thil ngaihtuah ṭhin, pawl bik thuneihna laka fihlim an nih a beiseina avangin, club hian kum riat chhung ngawt chu an kalphung leh dan zawng zawng ṭha takin a lo zawm tawh a ni," tiin thuchhuah an siam.

February 2023 khan City chuan, an chunga hekna siam a ni chu mak an tih thu an tarlang a, dinhmun tichiang tura duhsak bik nei lo 'independent commission'-in a hranpaa an ngaihtuah tur chu lawmawm an tih thu an tarlang tawh a ni.

Dan bawhchhiaa Man City puhna hi kum 2009 leh 2018 chhunga thil thleng a ni a, German chanchinbu Der Spiegel-in November 2018-a an sum leh pai kaihhnawih lehkha pawimawh put ru an tihchhuah aṭangin an chhui ṭan.

Premier League chuan City hi an sum dinhmun dik tak puangzar loah an puh a, hetah hian player leh coach hlawh chungchangah bakah UEFA financial fair play dan bakah Premier League profitability and sustainability rules (PSR) zawm loah an puh. City chuan heng puhna zawng zawng hi a pha vek a ni.

Kum 2008 aṭangin City hi Abu Dhabi United Group-in an lei a, club neitu Sheikh Mansour hnuaiah hian Premier League nomawi pariat, FA Cup pali, League Cup pasarih leh Champions League (1) ah te an champion.

February 2020 khan UEFA chuan City hi kum hnih inelnaa tel thei lo tur leh €30mtd chawi turin a hrem a, mah se thla nga hnuah Court of Arbitration for Sport (CAS) chuan thutlukna hi a thlak. CAS-in thutlukna a sut chhan hi, City dan bawhchhiatna hi UEFA dan siam hmalama thil thleng a nih vang a ni.

Chutihrualin City hi UEFA thlawp ṭhat tawk loh avang leh an dikna hailanna tura lehkha pawimawh an neih ṭhat tawk loh avangin pound maktaduai 8.8 chawi tura tih an ni ta tho.

Premier League nena an inkar bikah City laka thubuai hi December 2018 aṭangin chhui ṭan a ni a, kum li leh thla hnih vel an chhui hnuah February 2023 khan Premier League chuan City lakah thubuai 115 ngawt an ziak lut. September – November 2024 khan independent commission hmaah City hi an inlan tawh a, buaina inṭan aṭanga kum riat dawn hnuah thutlukna a awm thei dawn niin alang.

City hremna hmachhawn theih chu point paihsak leh sum chawi bakah Premier League aṭanga paih thlak thlengin a tel a, dan bawhchhia nia an puh hun chhunga an nomawi chawi angte an lak kir sak thei bawk. English club hian Premier League vawi thum, FA Cup vawi hnih, League Cup vawi li leh Community Shield-ah te nomawi an chawi a ni.