Joseph leh Benjamin-a inlan leh dawn

Mizoram Labour Link LPS Pro Fight 2026 zan 17-na chu zaninah chhunzawm leh a ni dawn a, bout 12 hmuh tur a awm leh dawn. Zaninah inhnek turah Benjamin Lalthantluanga leh Joseph Lalmalsawma te an tel avangin boruak a nun leh a rinawm.

Hmabak êng Benjamin

Benjamin-a'n zanin inhnek a hawng dawn a, Ṭawipui South boxer Hmingdailova a hmachhawn dawn. Khatla East rawlthar hi a pumrua lian loin tharum ngah lo mah se a thiamna chu a chakpui ṭhin.

A inhnek hnuhnung bera Lalṭhazuala a hneh ṭumin Benjamin-a hian tharumah a ngam lo a, mahse insaseng pahin ṭha takin a hneh thei zel a, zaninah pawh a thiamna chu a innghahna a ni leh ang.

Chutihrualin a hmachhawn tur Hmingdailova hi vawi hnih a inhnek tawhah, unanimous decision-in a la chak ve ve a, inrintawkna a neih san lai tak a nih avangin chak loh a duh dawn lo.

Ṭhuampui tlangval

Pro Fight-a tawnhriat nei lo Joseph-a a huaisen a, a inhnek hmasa zawka a khingpui Henry Lallianmawia chu tharumah ngam lo mah se a hlau lo a, a ṭul hunah a nawr ngam bakah 'footwork' ṭha tak nena hmachhawn theih avangin a chak.

Joseph-a'n ṭantu a ngah ṭhin a, zaninah pawh a fan te chu boruak tinungtu ber an nih leh a rinawm. Chutihrualin Joseph-a hi a fitness a ṭha tawk lo a, round thumnaah a chau hle.

A hmachhawn tur Lalhlupuia Zote hi a inhnek hmasa zawkah technical knockout-a a chak tawh avangin a fimkhur a ngai dawn a, Ṭhuampui boxer hi round hnih an khelh zawh hnua a chau leh a nih chuan a chak lohna chance a sang tawh.

Pro Fight hi LPS Arena, Falkland-ah neih a ni a, a hmunah Rs 50 chawiin a en theih a, LPS YouTube channel-ah member tan a en theih bawk. Member nih man hi Rs 179 a ni.