Mizo nula Rempuii'n bronze a la

Yonex-Sunrise Dr Akhilesh Das Gupta Memorial All India Senior Ranking Badminton Tournament 2026-ah Serchhip nula Lalrempuii chuan bronze a la. Inelna hi Lucknow-ah khelh a ni a, Rempuii hi Vansh Dev nen inkawpin nimin khan semifinal-ah an vanduai a, bronze medal-ah an lungawi a ṭul.

Albert Lalrosanga (L) fanu Rempuii leh Vansh te hi qualifying round aṭangin an ṭan a, main draw an invaw kai. Main draw-a an match hmasa ber, round of 32-ah tournament-a seeded no. 2 Aman Farogh Sanjay leh Sonali Mirkhelkar-te inkawp chu tum nghal in, 16-14, 8-15, 15-12 in an hneh.

Round of 16 ah Soham Phatak leh Siya Singh-te ṭang dun chu 11-15, 15-12, 15-9 in an hneh leh a. Quarterfinal-ah pawh tournament seeded no. 7 ni thei, Aaryan Sapiah leh Pranavi Natarajan-te ṭangdun lakah 15-12, 15-13 in hnehna an chang.

Semi final hmuhnawm takah anmahni ang bawka qualifying round aṭanga bul ṭan, Bhavya Chhabra leh Aditi Bhatt-te nen intumin, chak zawk thei dinhmun a ding chungin a tawpah vanduai zawkah an ṭang a, 8-15, 15-13, 13-15 in deciding game ah an chak lo. Pathumna dinhmun an luah a ngaih phah ta a ni.

Rempuii hi Tata Trusts, NEIDA, PGBA, MSSC leh MBA te thawhhona, Mizoram Badminton Initiative aṭanga badminton khelh zir ṭan a ni a, Regional Development Centre, Serchhip-ah bul a ṭan a, chuta ṭangin Pullela Gopichand Badminton Academy, Hyderabad-ah insawn thlain, tunah hian National Centre of Excellence, Guwahati-ah hun pum a training neiin a awm mek.

Serchhip nula Rempuii hi kumin kum tir lama MSSC-in "Most promising sports women of the year"-ah an thlang a, Mizo hmeichhe zingah Senior National Ranking Tournament-a semi final lut thei hmasa ber leh medal la thei hmasa ber a ni. Mizoram Badminton Association chuan Rempuii an lawmpui thu an sawi a, Mizo hmeichhe dinhmun chawi sang zel tur leh hlawhtlinna chang chhunzawm zel turin duhsakna an hlan.