France chakna Mbappe a inhliam

Zinedine Zidane-a enkawl France chuan Zirtawpni zan khan Nations League-ah Kylian Mbappe goal hmangin Turkey an hneh a, Les Bleus hi chak mah se goal khungtu Mbappe a inhliam avangin an lawm a kim lo.

Kum 27 mi Mbappe hian minute 54-naah France chakna goal a khung a, mahse ball a petna lamah a khup vei lam a tina. Mbappe hian khelh chhunzawm tum mah se minute 59-naah lak chhuah a ni tan zawk a, Paris Saint-Germain forward Désiré Doué-a'n a thlak.

AS Monaco forward hlui khup hliam hi a 'serious' lutuk lo angin sawi mah se, Mbappe ber chu squad aṭanga inhnukdawkin Madrid a pan a, October 25 zana Barcelona nen El Clasico an khelh huna a khelh theih loh a hlauh vang niin khawthlang chanchinbute chuan an ziak.

French Football Federation (FFF) pawhin, "Kylian Mbappe chu chakna goal a khungna lamah a khup a tina a, inenkawl turin Madrid a pan," tiin thuchhuah an siam a, Mbappe hi kar hnih vel a chawlh rin a ni.

Mbappe hian tun season-ah Real tan inelna hrang hrangah goal kua a khung tling leh der tawh a, Jose Mourinho hnuaiah hmun pawimawh a chang leh nghal. La Liga-ah beisei anga an chet ṭhat loh avangin French forward hi a dam leh vat a pawimawh dawn.

Les Bleus hian zanin dar 12:15-ah Belgium an hmachhawn dawn a, Red Devils hi football ram lian Italy hneh zo hlim an nih avangin an boruak ṭhat lai tak a ni a, France tan zuam chi an ni dawn lo.

France tan Mbappe awm dawn lo mah se, a hmun ruak hnawh khat turin Esteban Lepaul leh a teammate hlui Ousmane Dembele te an la neih avangin Zidane-a tan hlauhthawnna tur a awm lo ang.