Italy tan kawl a êng thei lo

28th September, 2026

Roberto Mancini hnuaiah Italy chuan beiseina thar nen ke pen mah se hma an sawn thei lo a, Inrinni zan khan Rome khawpuiah 2-0 in Belgium an hneh lo a, Nations League-a an match hmasa berah an tlawm nghal.

Belgium tan Mika Godts leh Dodi Lukebakio ten goal khat ve ve an khung a, Italy-in an mualpho hliahna turin goal khat pawh an khung thei lo.

Inkhel chu

Stadio Olimpico-a inkhelah Italy-in bul an ṭan chhe lo a, a nawrtuah an ṭang hmasa zawk a, mahse chance hlauhawm an insiam hleithei lo. Inter Milan forward Pio Esposito-a'n goal ban a pet per a, Fiorentina forward Moise Kean-a'n shot chu Belgium keeper Senne Lammens-a'n a dansak bawk.

Red Devils erawhin an chance neih an chhawr ṭangkai nghal a, Charles De Ketelaere-a'n chance hmasa ber hlah nghal mah se Mika Godts-a'n a hlah ve duh lo.

Paris Saint-Germain forward hian minute 20-naah box chhungah khalh lutin, Gianluca Mancini leh Diego Coppola a bum hnuah cool takin an hmahruaina goal a khung a, World Cup khel tura Rudi Garcia-a'n a hruai ve loh zinga mi Godts tan ram tana a goal hmasa ber a ni.

Chhandamtu Donnarumma

Goal an khung hnuah Belgium an phur a, chance an nei nghal mawlh mawlh. Azzurri erawh an bet chhunzawm a, keeper Gianluigi Donnarumma-a chet ṭhat avangin an mualpho lo hlauh.

Manchester City keeper hian De Ketelaere shot kawh zet a dan hnuah hnai tak aṭanga Nicolas Raskin-a pet a dang leh a, goal hmahruai khungtu Godts-a tauh luh ngei tura lang chu a dang leh hman bawk.

Vanduaina

Second half-ah Azzurri an nung thar a, Kean leh Esposito ten chance duhawm nei mah se Manchester United keeper-in ṭha takin a dansak ve ve a, goal hmaah an hriam tawk lo.

Belgium tan minute 69-naah Lukebakio-a'n box pawn aṭangin mawi zetin goal kilah tak a pet lut a, Donnarumma-a'n a dang thei lo. Mancini nauten hun tawp thlenga goal an khung theih loh avangin a tlawm zawkah an ṭang. Azzurri hi group A-ah awmin France leh Turkey te nen an awm ho a, zanin dar 12:15-ah Turkey an hmachhawn leh nghal dawn. An chak lo leh a nih chuan knockout stage luh a harsa tawh ang.