Warriors-ah Curry a khel zel dawn

Golden State Warriors innghahna Stephen Curry chuan contract thar a ziak a, Curry hian kum hnih daih contract ziakin 2029 thleng a châm dawn. An inremna tharah hian American point guard hian dollar maktaduai 116 a hlawh dawn.

Kum 38 mi Curry hian season khat daih bak contract a nei tawh lo a, contract thar a ziak lawk loh avangin kum khat hnuah emaw tun nipuiah a chhuah ringtu an tam hle. Mahse Curry hian a club tana rinawm a thlang a, $136 mtd hlawh theih dan nei mah se a club tan $116 mtd hlawh a remti.

Warriors general manager Mike Dunleavy chuan Curry-a'n a contract a pawhsei avangin kan lawm hle a, court chhung leh pawnah hruaitu ṭha tak a ni a, he club tana mi pawimawh tak a nih avangin kan hnehah a châm chhunzawm tur aia lawmna dang a awm lo ang," a ti.

Curry hi kum 2009 NBA draft-ah khan Warriors chuan an club-a khel turin an la lut a, NBA-ah club dang tan a la khel lo. Warriors hi vawi li champion pui tawhin, Most Valuable Player (MVP) vawi hnih ni tawhin Finals MVP vawi khat a ni tawh bawk. Hei bakah hian vawi 12 zet All Star-ah thlan a ni tawh a, All Star MVP-ah vawi hnih thlan a ni tawh bawk.

American point guard hian season hmasa khan match 43 chauh khel mah se vawi 41 bul a ṭan thei a, match tinah point 26.6, assist 4.7 leh rebound 3.6 nei ziah ang a ni. Season hmasa khan playoff-ah Phoenix Suns hneh loin tla mah se Curry hi player pawimawh a ni a, team innghahna ber a ni ang.

Tun nipuiah Warriors hian Georges Niang, Brandon Williams leh Yaxel Lendeborg te an la lut tawh a, veteran player dang Draymond Green chu contract thar an ziahpui bawk a, Curry hoin a sang thei ang ber thlen an tum dawn a ni.