Azerbaijan GP-ah Russell a chak

Mercedes driver George Russell chuan Inrinni tlai khan harsa takin Azerbaijan Grand Prix-ah hnehna a chang a, British driver hi a dawt chiaha thleng Max Verstappen nen an inthlauhna chu second khat pawh a tling lo.

Kum 28 mi Russell-a tan tun season-a vawi thum a chakna chiah a ni a, driver's table-ah a teammate Andrea Kimi Antonelli chiah a tluk lo. Pahnihna Verstappen erawh tun season-a podium vawi sarih a lawnna a ni a, Red Bull driver hian hnehna a la chang thei lo tluang zel.

Baku City Circuit-a intlansiakah Red Bull chuan hnehna chang lo mah se an che ṭha a, an driver pahnihten podium an lawn. Isack Hadjar chu pathumna niin hliam a neih hnua a lo kir lehna hmasa berah podium a lawn nghal.

Palinaah Ferrari driver Charles Leclerc a thleng a, driver's table-a hmahruaitu Kimi Antonelli chu panganaah thlengin a dawt chiahah hian Ferrari driver pakhat zawk Lewis Hamilton a thleng bawk.

Azerbaijan GP-ah hian driver pasarih zet chu an tlan tluan thei lo a, an zingah McLaren driver Lando Norris-a langsar hle. Lap 36-naah Alpine driver Franco Colapinto leh Pierre Gasly te chetsual avangin Norris an hnawl tel.

Norris bakah Alpine driver pahnihte hi an tlan tluan thei lo bawk a, Alpine tan Azerbaijan GP hi chhinchhiah tlak a ni lo. Chutihrualin McLaren driver pakhat zawk Oscar Piastri pawh 13-naah a thlen hram avangin point a hmu lo a, McLaren an tlan ṭha bik lo.

October 4, Pathianni hian Bahrain GP a awm leh nghal dawn a, driver ten chawlh an nei rei dawn lo hle. Kumin Bahrain GP hi West Asia-a indona boruak avangin Malaysia-ah sawn a ni a, Malaysian GP neihna ṭhin Sepang Circuit-ah an tlan dawn.