Mizoram Labour Link LPS Pro Fight 2026: Ruatkima a chak zel

Mizoram Labour Link LPS Pro Fight 2026 zan 15-na leh 16-na chu Zirtawpni leh Inrinni zan khan LPS Arena, Falkland-ah neih chhunzawm a ni a, Inrinni zanah erawh Bantamweight-a mipui ṭan hlawh Lalruatkima'n hnehna a chang chhunzawm.

Zirtawpni zanah Lightweight-a ngaihven hlawh Lalrohlua Pautu a chak laiin, middleweight-ah Boyka Lalhriatsanga a chak zo lo a, quarterfinal a lut zo lo.

Ruatkima a bawn

Inrinni zan inhnekah Ruatkima'n unanimous decision-in Lalhmangaihkima a hneh a, Falkland veng tlangval Rka hi Northeast Regional Muaythai Championship 2026-a gold la zo hlim a ni a, hliam tenau a nei tih hriat takin a ke a bai deuh.

Rka'n hliam nei mah se a khel a hmuhnawm loh phah lo a, a inhnek hmasak zawk angin a nawrtuah a ṭang tluan zak. Chutihrualin Rka hi round thumnaah a chau tih a hriat a, title a chuh ngam dawn a nih chuan a fitness a ngaih pawimawh a ṭul tawh ang.

Zirtawp zan

Zan 15-naah Kanan Veng tlangval Lalrohlua-a'n East Lungdar boxer David Malsawmzela chu unanimous decision-in a hneh a, Rohlua hi a tawp thlengin khawng takin a ding a, chak a phu zawkah a ngaih theih.

Hetihlai hian 'main event'-a ngaih theih inhnekah Boyka a chak zo lo a, Vaitin boxer hian Lunglei Salem Veng boxer Franky H Vanlalruatpuia a hneh zo lo. Inhnek an ṭan aṭangin Boyka a bet zawk a, Franky chu a nawrtuah a ṭang tluan.

Seeded-a tel phâk Franky hian round thumnaah Boyka a hnek tlu hial. Boyka tho leh thei mah se fitness-ah a ṭhat loh zawk avangin Lunglei boxer Franky-a chak a, quarterfinal a lut.