Venghnuai semifinal beiseina a tawp?

Mizoram Premier League Season 8-ah kai thar FC Venghnuai leh Ramhlun North te nimin tlai khan 3-3 in an inhnehtawk a, Rindika Hmar hoten point khat chauh an hlawhchhuah avangin semifinal luh a harsa tawh ang. 

Lammual inkhel hmuhnawm takah Ramhlun North-in Lalpekhlua Jongte hmangin minute 14 chhung lekin 2-0 in hma an hruai. Venghnuaiin first half-ah vek Vanlalthanga goal hnih hmangin chhanglet mah se Hualngohmun tlangval goal hnih khung inkarah hian Lalremsanga'n a khung avangin halftime-ah Ramhlun North 3-2 in hma an hruai ta tho. Second half-ah Venghnuai defender Lalruatfela'n nalh zetin a back volley lut a, 3-3 in inkhel a tawp. 

Tualchhung inelna ngaihhlut I Day Football-ah FC Venghnuaiin final an thlen theih avangin MPL-ah pawh inrintawkna an nghah a, bul pawh an ṭan chhe lo. Amaherawhchu phase 2 chinah MPL club thar puitlin lohna a lang a, match thum an khelh tawh aṭangin point khat chauh an hlawh chhuak.

Nimin inkhelah hian Venghnuai hi chak tura rinkai zawk ni mah se inkhelah erawh Ramhlun North chak phu zawk an ni a, hun tawp hma hreta Sialhawk tlangval Lalramhluna chance ṭha hlah chu minute 90 chhung sawifiahna a tih theih.

Chutihrualin Venghnuai pawh an khelh ṭhat ṭum a ni lo chungin vanneih ṭum chu ni se chak thei an ni a, hun tawp hma hretin Lunglei tlangval HK Lalhruaitluanga'n keeper chauh a hmachhawn hnuah a pet over. Rindika Hmar hote hian Aizawl FC, Chawnpui FC leh Electric Veng an la hmachhawn dawn. An chak vek a nih chuan semifinal luh theih dan a awm ang.

Ramhlun North erawhin relegation playoff pumpelh theihna hun ṭha an hlah a, an elpui Venghnuai point an chhuhsak theih loh avangin pasarihna chu season tawpa an awmna tur a ang ta hle.