Steven Dias hun a inṭan dawn ta

Zanin dar 7:00 hian India coach zinga hmabak nei êng ber zinga mi Steven Dias-a'n MPL-ah hna a ṭan dawn a, Chanmari FC leh Aizawl FC inkhel aṭanga a ṭan dawn avangin hmabak a harsa dawn hle.

Nimin khan ball pet thiam vanga 'David Beckham of India' tia an sawi ṭhin Steven Dias hian Hlimen Football Ground-ah Chanmari FC hi training a neihpui a, zanin aṭangin a ho dawn. Season liam taa champion puitu Rochhingpuia'n Dias hi a pui nghal dawn a, Chanmari fapa rangkachak tawnhriat hi a pawimawh dawn.

Dias tana chanchin lawmawm chu Aizawl FC hmachhawn turin Aron Vanlalrinchhana leh Lalthanzuala (TZ-a) ten hremna an hmang zo chiah a, squad kimin a hmachhawn thei dawn. CFC player thar Lalliansanga leh R. Ramdinthara (Tharpuia) ten match fitness an nei chho tawh bawk a, team tan an pawimawh lehzual ang.

Chanmari FC hian MPL nomawi humhim an tum bakah Indian Football League atana inpuahchahna an kalpui ṭan nghal a, Steven Dias hnuaia an khelh dan tur kal hmang pawh Aizawl FC an hmachhawn hunah a hriat theih dawn.

MPL khelh tawh chinah Chanmari FC hi an veng mipuiin an la thlawp ṭha tawk lo a, coach thar Dias-a bakah player-te phur nan CFC tan Chanmari mipui thlawpna a pawimawh ang. Dias tan hneh loh nei loa kal rei tawh Aizawl FC record tihtawp hi hlawhtlinna ropui tak a ni dawn a, Chanmari FC-in attacking football an khelh a ṭul avangin inkhel hmuhnawm bik a beisei theih ang.