MPL Board-in Aizawl FC coach an zilh

Aizawl FC coach R. Lalruatfela'n October 28, Thawhṭanni Vanglani chhuakah MPL Board-in hremna lehkha an pek tlai avanga a lungawi loh thu tihchhuah a ni a, nimin khan MPL Board chuan Kolasib tlangval R-a zilhna lehkha pein tihsual an neih loh thu an ziak tel bawk.

MPL Board chuan lehkhaah hian R-a chu MPL Handbook H8 hmanga hrem theih a nih thu an tarlang a, mah se Aizawl FC coach hi hrem nawn tawh lohin an zilh ta zawk. MPL dan buah chuan, "Player-in print media emaw, electronic media (Facebook, Twitter, Instagram, Youtube etc huamin) emaw kal tlanga mawi lo taka MPL Organisers, MFA Officials leh Referee- te a sawi chhia a nih chuan hrem theih a ni ang. Thutlukna chu MFA Disciplinary Committee kutah a awm ang," tiin a inziak.

Aizawl FC coach R-a hnenah hian MPL Board chuan an hrem chhan an tarlang nawn a, an hrem chhan hi referee lakah a ṭawngkam vang a ni. MPL Board thuziakah chuan, "Referee thuthluknaah lungawi loin, indiriamna leh inhmuhsitna ṭawngkam mawi lo tak, 'I ham thiam loh chuan ham lo mai rawh, nang Hortoki pa ve mai mai kha,' tiin referee chu i ṭawng khum a. Insual puiah i cho zui hial a ni," tiin an hrem chhan chiang takin an tarlang a, tinawn tawh lo turin an hriattir bawk.

Tualchhung football-ah player, coaching staff bakah mipui thlengin referee zah lohna a thleng fo a, hei vang hian MFA pawhin referee zahawmna humhim turin an chhan na hle. Referee lam pawhin an fitness leh dan hriat kawngah te ṭan an la nasa a, MPL 13-ah hian referee-te hmasawnna turin referee assessor (RA) te an ruat, RA ho hian match zawhah an sawiho leh ṭhin. Referee-te chet dan hi referee committee-te pawhin thlir rengin puang chhuak lem loin hma an la ṭhin a ni.